Өвөрхангай аймгийн Сант сумын Засаг дарга бөгөөд АН-ын дарга Б.Баянмөнхийн амь насанд халдсан хэрэг энэ сарын 15-16-нд /2024.06/ шилжих шөнө гарсан. Цагдаагийн газраас өгсөн мэдээллээр Б.Баянмөнхийн амь насанд халдсан гэмт хэрэг үйлдсэн хүн нь МАН-ын ухуулагч П.Отгонбаатар гэгч байсан гэж буй. Тус ухуулагч нь УИХ–ын 1дүгээр тойрогт МАН-аас нэр дэвшигч Г.Сайханбаярын сонгуулийн штабтай гэрээ байгуулан ухуулагчаар ажиллаж байсан учраас нэр дэвшигч Г.Сайханбаярыг эргүүлэн татах улс төрийн шийдвэрийг МАН-аас гаргасан. Харин Сонгуулийн тухай хуульд зааснаар нэр дэвшигч Г.Сайханбаярыг эргүүлэн татах боломжгүй бас саналын хуудаснаас нэрийг нь авах хуулийн зохицуулалт байхгүй аж.
Энэ талаар СЕХ-оос “Нам нь нэр дэвшигчээ татна гээд зарласан учраас нэр дэвшигч сонгуулийн кампанит ажлаа зогсооно гэсэн үг. Тэр хүний нэр саналын хуудаст бичигддэгээрээ бичигдэнэ. Хэрвээ энэ хүн сонгогдох түвшинд санал авбал нам нь энэ хүнээ эргүүлэн татах шийдвэр гаргах эсвэл өөрөө татгалзана” гэжээ. Энэ нь нэр дэвшигч Г.Сайханбаяр сонгогдлоо гэхэд нам нь түүний нэрийг татна эсвэл өөрөө татгалзаж дараагийн хүн парламентын гишүүн болох аж. Тодруулбал, хангайн бүс есөн мандаттай тойрог учраас хамгийн их санал авсан 10 дахь хүн нь Г.Сайханбаяр нэр дэвшигчийн оронд парламентын гишүүн болох юм байна.
Сонгуулийн тухай хуульд зааснаар нэр дэвшигч нэр дэвшигчийн үнэмлэхээ авснаас хойш эргүүлэн татах боломжгүй гэсэн заасан. Тодруулбал, 32.13.Нэр дэвшигчээр бүртгэх тухай шийдвэр гарснаас хойш нэр дэвшигчээс татгалзахыг хориглоно гэж заасан.
