Өнгөрсөн Бямба гарагт /2024.06.08/ Увс аймгийн Засаг даргын ивээл дор ЕБ-ын мэргэжлийн болон Техникийн боловсролын багш, суралцагчдын амжилтыг урамшуулах “Амжилт, бахархал – 2024” ёслолын үйл ажиллагаа болсон.
Энэ үеэр Увс аймгийн боловсролын салбарт 2023-2024 оны хичээлийн жилийн улсын төрөлжсөн олимпиад, уралдаанд онцгой амжилт гаргасан багш, сурагчид, анги хамт олныг Аймгийн Засаг дарга, ЗДТГ-ын зүгээс урамшуулж, алдаршуулжээ.
Тэгвэл эл үйл ажиллагааны үеэр багш, сурагчдыг мөнгөн шагналаар шагнахдаа сурагч нь алтан медаль авсан багшид 40 мянган төгрөг, мөнгөн медаль авсан бол 30 мянган төгрөг, хүрэл медальд 20 мянган төгрөг болон өргөмжлөл гардуулжээ.
Улмаар эл үйлдэлд тус аймгийн зарим иргэд дургүйцлээ илэрхийлээд байна. Учир нь олимпиадад бэлтгэж буй багш, сурагчдад Увс аймгийн зүгээр замын зардал ч өгдөггүй хэр нь түрүү байр эзэлсэн сурагчдын багш нарт 20-40 мянган төгрөг гардуулсан ажлаа ёслолын ажиллагаа болгон зарлаж буй аж.
