АНУ-ын хуульч, түүх судлаач Мори Кравицын хувийн цуглуулгад байсан Монголын эзэнт гүрэн, Чингис хаантай холбоотой 120 гаруй номыг манай улсад америк судлаачдын байгуулсан Монгол судлалын төвд хандивласныг Үндэсний номын санд хүлээлгэн өгсөн байна.
Энэ үеэр Үндэсний номын сан болон Монгол судлалын төв харилцан ойлголцлын санамж бичиг байгуулж, америк судлаачийн цуглуулгаар үзэсгэлэн гаргахын зэрэгцээ Чингис хааны өв соёлын хүрээлэнтэй хамтран номуудыг судалгааны эргэлтэд оруулахаар болсон байна. М.Кравиц нь Монголын эзэнт гүрэн, Чингис хааны тухай 400 гаруй ховор нандин ном бүтээлийг дэлхийн өнцөг булан бүрээс цуглуулснаас 120 гаруйг нь Монгол судлалын төвд үр хүүхэд, ач зээ нар нь хандивлажээ.
Тэдгээрийн дунд 1860 онд хэвлэгдсэн Жэкоб Абботтын “Чингис хааны түүх” номын анхдугаар хэвлэл, 1977 онд хэвлэгдсэн А.Боёлегийн “Монголын дэлхийн эзэнт гүрэн”, 1933 онд хэвлэгдсэн С.Хэдиний “Говийн нууц”, Р.Груссегийн “Дэлхийг байлдан дагуулагч”, “Чингис хааны амьдрал” зэрэг номууд багтжээ. Үүнээс гадна М.Кравицийн номын тэмдэглэл, монгол эрдэмтдийн түүнд дурсгал болгон өгсөн гарын үсэгтэй ховор номууд, газрын зургууд мөн байгаа аж. Монголын эзэнт гүрний түүх, Чингис хааныг шүтэн бишрэгч М.Кравиц 2000 оны үед их хааны онгоныг эрэн хайх ажиллагаанд 1.2 сая доллар босгон хэд хэдэн удаа хээрийн судалгааны анги удирдан зохион байгуулж байсан юм. Тэрбээр 2012 онд 80 настайдаа АНУ-ын Чикагод нас баржээ.
