Засгийн газрын өнөөдрийн /2023.09.20/ хуралдаанаас гаргасан шийдвэрийг танилцуулж байна. Хуралдаанаар Монгол Улсын Ерөнхий сайдын Дархан-Уул, Сэлэнгэ, Архангай зэрэг арван аймагт ажилласан дүнг хэлэлцсэн. Энэ талаар ЗГХЭГ-ын дарга Д.Амарбаясгалан мэдээлэл өглөө.
Тэрбээр, "Өмнө нь УИХ-ын гишүүд болон орон нутгийн удирдлагуудын саналд тулгуурлан Монгол Улсын төсвийг баталж байсан. Тэгвэл энэ жилээс эхлэн тухайн аймаг орон нутгийн иргэд, олон нийтийн санал санаачлагад тулгуурлан, ач холбогдлыг эрэмбэлж, улсын төсөвт бүрэн суулгах чиглэлээр ажиллаж байна. Тухайлбал Ерөнхий сайдын ажилласан арван аймгийн голлох асуудал нь дэд бүтцийн асуудал байсан бөгөөд аймаг орон нутгийг холбосон авто замуудыг шийдвэрлэх шаардлагатай байна. Иймд Говь-Алтай аймгийг Завхан аймгийн Улиастай хоттой холбох, Ховд аймгийг Увс аймгийн Улаангом сумтай холбох автозамын төслийг Азийн хөгжлийн банкны хөнгөлөлттэй зээлээр хэрэгжүүлэх талаар яригдлаа.
Мөн дулаан хангамж болон түүний дэд бүтцийн асуудал тулгамдаж байгаа талаар иргэд хэлж байгаа учраас Ерөнхий сайд энэ асуудлыг чухал гэж үзэн ирэх оны төсөвт тусгах үүрэг чиглэлийг өгсөн.
Түүнчлэн Ерөнхий сайдын аймаг, орон нутагт ажилласан ажлын үр дүнгээр 2024 оны улсын төсвийг боловсруулна. Эргээд энэ төсвийг бодитой, цаг хугацаандаа, амжилттай болох нөхцлийг хангах үүднээс өнөөдрийн засгийн газрын хуралдаанаар хоёр асуудлыг мөн хэлэлцлээ.
Нэгдүгээрт улсын төсвийн хөрөнгө оруулалтаар ажил үйлчилгээ авч хийхдээ хангалтгүй, чанаргүй хийсэн аж ахуйн нэгжүүдийг хар болон саарал жагсаалтад оруулах, амжилттай сайн хэрэгжүүлж буй төсөл хэрэгжүүлэгч нарыг цагаан жагсаалтад оруулах үйл ажиллагааг Засгийн газрын шийдвэрээр хэрэгжүүлдэг байхыг үүрэг болгосон юм.
Хоёрдугаарт өнгөрсөн хугацаанд улсын төсвөөр хийгдэхдээ төсөв мөнгө хүрэлцэхгүй гэх шалтгаанаар бүтээн байгуулалтын ажил нь удааширсан, хөрөнгө оруулалтын ажлыг хурдасгах арга хэмжээг түргэн шуурхай гүйцэтгэхийг үүрэг болгосон байна" гэлээ.
ҮЗЭХ:
