Архангай аймгийн Булган сумын Тамир багийн “Асгат” гэдэг газар дөрвөн хүн самар түүж байснаас иргэн У-нь сураггүй болсон талаар бид мэдээлсэн билээ. Тэгвэл тухайн иргэнийг олсон байна.
Тодруулбал тухайн иргэн алга болсон тухай дуудлагыг нэгдүгээр сарын 09-ний өдрийн 01:15 цагт тус аймгийн онцгой байдлын алба хүлээн авчээ. Уг дуудлагын дагуу аймгийн Онцгой байдлын газрын Эрэн хайх, аврах салбарын алба, Тамгын газрын ажилтнууд, ар гэрийнхэн иргэн У /25 настай, эрэгтэй/-ыг эрэн хайх ажиллагааг зохион байгуулсан байна. Улмаар нэгдүгээр сарын 09-ний өдрийн 15:25 цагт Ихтамир сумын Хан-Өндөр багийн Их-Өлөнт гэдэг газарт төөрсөн явж байхад нь эсэн мэнд /сураггүй болсон газраас зүүн хойд зүгт 14 км-т, биеийн байдал хэвийн/ олж, Булган сум дахь Цагдаагийн хэсгийн мөрдөгчид хүлээлгэн өгчээ.
М.АРИУНАА