Шатахуун тээвэрлэж явсан ачааны автомашин замын хажуу руу унаж, хоёр хүн нас баржээ.
Тодруулбал, аймгийн онцгой байдлын албанд "Ховд аймгийн Манхан сумын Ботгон багийн “Ботгоны хавцал” гэдэг газар /аймгийн төвөөс баруун зүүн урд зүгт 120 км, сумын төвөөс зүүн зүгт 55 км/-т ачааны замын хажуу руу унаж автомашины бүхээгт 2 хүн хавчуулагдсан" тухай дуудлага 11.14-ний өдрийн 19:23 цагт иржээ.
Тус аймгийн Онцгой байдлын газрын Манхан сум дахь Эрэн хайх, аврах бүлгийн алба хаагчдыг очиход Баян-Өлгий аймгаас Баянхонгор аймгийн чиглэлд шатахуун тээвэрлэж явсан ”Норд Бенз” загварын ачааны автомашин автозамын хажуу руу унаж жолооч А /51 настай, эрэгтэй/, зорчигч Ш /44 настай, эрэгтэй/ нар автомашины бүхээгт хавчуулагдаж нас барсан байсан аж. Албан хаагчид 1 цаг ажиллаж цогцсыг гарган, аймгийн тээврийн Цагдаагийн тасгийн даргаар ахлуулсан бүрэлдэхүүнд шилжүүлэн өгсөн байна.
