Боловсрол Шинжлэх ухааны сайд Л.Энхтайван ерөнхий боловсролын сургуулийн сурагчдын хичээлийг есдүгээр сарын 1-нд эхлүүлнэ хэмээн мэдэгдсэн билээ. Тэгвэл Засгийн газрын өнөөдрийн хуралдаанаар уг асуудлыг хэлэлцсэн байна.
Энэ талаар Ерөнхий сайдын хэвлэлийн төлөөлөгч Ч.Болортуяа “Есдүгээр сарын 1-нд хичээл сургуулийн үйл ажиллагааг эхлүүлэх хуультай байдаг. Ерөнхий сайд есдүгээр сарын 1-нд хичээл сургуулийн үйл ажиллагааг эхлүүлэхийн тулд бүхий л бэлтгэл ажлаа хангах үүргийг холбогдох албан тушаалтнууд, яамдын удирдлагуудад өгсөн байгаа. Яг есдүгээр сарын 1-нд хичээл эхэлнэ гэдэг хүлээлтийг иргэд зөвөөр ойлгох хэрэгтэй. Дельта вирусийн тархалтаас шалтгаалж, хичээл сургуулийн төлөвлөлтийг хийнэ гэж Ерөнхий сайд, Засгийн газар, УОК-ын зүгээс өгч байна. Наймдугаар сарын 19-22-ны хооронд ЭЕШ болно. ЭЕШ-ыг харьцангуй дархлаажуулалтад хамрагдсан хүүхэд, залуусын дунд зохион байгуулах учраас эрсдэл бага гэж үзэж байгаа ч дархлаажуулалтад хамрагдаагүй байгаа 6-11 насны хүүхдүүдийг яах талаар 100 хувь шийдэгдээгүй. Өвчний нөхцөл байдлыг харгалзаж, хичээл сургууль эхлэх асуудлыг шийднэ.