Улсын Их Хурлын дарга Ням-Осорын Учрал ОХУ-ын Төрийн Думын дарга Вячеслав Володины урилгаар хоёрдугаар сарын 9-нөөс 12-ны хооронд Оросын Холбооны Улсад албан ёсны айлчлал хийж байна. Энэхүү айлчлалын талаар ОХУ-ын төрийн хэвлэл мэдээллийн хэрэгсэл болох ТАСС агентлаг тухай бүрд нь мэдээлж байгаа.
Тэгвэл ТАСС агентлаг нэгэн мэдээлэлдээ УИХ-ын дарга Н.Учралын танилцуулгыг дурдахдаа түүнийг ОХУ-аас гаралтай цагаач гэр бүлээс угсаатай гэж бичжээ.
Уг нийтлэлд, "Ням-Осорын Учрал нь 2025 оны 11-р сард Монгол Улсын Их Хурлын 14 дэх даргаар сонгогдсоноос хойш гадаадад хийж буй анхны албан ёсны айлчлал нь энэ юм. Тэрбээр 23 насандаа МАН-д элссэн бөгөөд 38 настайдаа МАН-ын дарга болж, 1990 оноос хойш МАН-ын түүхэн дэх хамгийн залуу удирдагч болоод байна. Тэрээр 1917 оны Октябрийн хувьсгалын дараа Оросоос гарч, Оросын хил залгаа Хэнтий аймагт суурьшсан Буриад цагаачдын гэр бүлээс гаралтай. 2013 онд улс төрч Оросын Шинжлэх Ухааны Академийн Сибирийн салбарын Монгол, Буддын шашин, Төвдийн судлалын хүрээлэнд (IMBIT) докторын зэрэг хамгаалсан. Түүний диссертацийн сэдэв нь "Монголын тусгаар тогтнол, бүрэн эрхт байдлын төлөөх тэмцэл: 1924-1945 он" байв" гэжээ.
Эх сурвалж: ТАСС агентлаг
