Сүүлийн хоёр сарын хугацаанд АНУ-ын Хууль зүйн яам Жеффри Эпштейнтэй холбоотой бэлгийн наймааны мөрдөн байцаалтад хамаарах олон баримт бичгийг олон нийтэд ил болгосон. Тэгвэл АНУ-ын Ерөнхийлөгч Д.Трамп "улс орон энэ сэдвээс цааш явах цаг болсон" гэж мэдэгдэж байна.
АНУ-ын Ерөнхий прокурорын орлогч Тодд Бланш эдгээр материалыг бүрэн хянан үзсэн бөгөөд шинээр яллах үндэслэл илрээгүй гэж мэдэгдсэн юм. Тэрбээр "их хэмжээний имэйл, захидал, гэрэл зураг байгаа ч тэдгээр нь заавал ял тулгах түвшинд хүрэхгүй" гэж онцолжээ. Гэсэн хэдий ч АНУ-ын Конгресс дахь шалгалт үргэлжилж байгаа юм.
Төлөөлөгчдийн танхим Жеффри Эпштейний хэрэгтэй холбоотой өөрийн мөрдөн шалгах ажиллагааг үргэлжлүүлж байгаа бөгөөд АНУ-ын Ерөнхийлөгч асан Билл Клинтон болон Төрийн нарийн бичгийн дарга асан Хиллари Клинтон нарыг Конгрессыг үл тоомсорлосон гэх үндэслэлээр мэдүүлэг өгөхийг шаардсан юм.
Жеффри Эпштейний хохирогчид болон хууль тогтоогчид нийтлэгдсэн файлуудад ороогүй нэмэлт баримт бичгүүд байж болзошгүй хэмээн илүү их ил тод байдлыг шаардаж байгаа нь энэ сэдвийг бүрэн хаахад хэцүү байгааг харуулж байгаа аж. Д.Трамп өөрийнх нь талаар "юу ч илрээгүй" гэж мэдэгдсэн ч түүний нэр Жеффри Эпштейнтэй холбоотой баримт бичгүүдэд олон мянган удаа дурдагдсан байна.
Д.Трамп, Ж.Эпштейн нар 1990-ээд онд ойр харилцаатай байсан бөгөөд Д.Трампын хэлснээр 2000-аад оны эхээр харилцаа нь тасарсан аж. Шинэ баримтууд тэдний нөхөрлөл хэзээ дууссаны талаарх Д.Трампын тайлбарыг бодитоор үгүйсгээгүй ч бүрэн хаахад хангалттай нотолгоо болж чадаагүй байна. Үүний зэрэгцээ Ж.Эпштейнтэй илүү нягт холбоотой байдал нь баримт бичгүүдэд тод туссан бусад нөлөө бүхий хүмүүс мэргэжлийн болон хувийн хүнд үр дагавартай тулгарсан хэвээр байгаа юм. Ийнхүү АНУ-ын Ерөнхийлөгч Д.Трамп Ж.Эпштейний асуудлаас "салах" хүслээ илэрхийлж байгаа ч тус улсын Конгрессын шалгалт, хохирогчдын шаардлага, ил болоогүй байж болзошгүй баримтуудын улмаас энэ маргаан ойрын хугацаанд бүрэн намжих төлөвгүй байгаа ажээ.
Эх сурвалж: BBC
