Ус цаг уур, орчны шинжилгээний газраас төвийн болон баруун аймгуудын нутгийн зарим газраар хур тунадас орж, сэрүүсэхийг анхааруулж байна. Тодруулбал, гуравдугаар сарын 25-нд баруун болон төвийн аймгуудын нутгийн зарим газраар хур тунадас орж, нутгийн хойд хэсгээр сэрүүсэж, говь, тал, хээрийн нутгаар салхитай байна.
Хур тунадас гуравдугаар сарын 24-нд Алтайн уулархаг нутгаар, гуравдугаар сарын 25-нд баруун болон төвийн аймгуудын нутгийн зарим газар, гуравдугаар сарын 26-нд баруун аймгуудын нутгийн зүүн өмнөд хэсэг, говь, төв, зүүн аймгуудын нутгийн зарим газраар, гуравдугаар сарын 27-нд Увс нуурын хотгороор, гуравдугаар сарын 28-нд баруун, төв, говийн аймгуудын нутгийн зарим газраар, гуравдугаар сарын 29-нд төв болон говийн аймгуудын ихэнх нутаг, зүүн аймгуудын нутгийн зарим газраар, гуравдугаар сарын 30-нд зүүн аймгуудын нутгийн өмнөд хэсэг болон баруун аймгуудын хойд хэсгээр, гуравдугаар сарын 31-нд баруун аймгуудын нутгийн зүүн хэсэг, төв, говь, зүүн аймгуудын ихэнх нутгаар, дөрөвдүгээр сарын 1-нд нутгийн зүүн хэсгээр нойтон цас, цас орж, цасан шуурга шуурна.
Салхи гуравдугаар сарын 24, 30-нд Алтайн салбар уулсаар, гуравдугаар сарын 25, 28-нд нутгийн зарим газраар, гуравдугаар сарын 31-нд ихэнх нутгаар, дөрөвдүгээр сарын 1-нд говь, тал, хээрийн нутгаар секундэд 16-18 метр хүрч ширүүсч, нутгийн өмнөд хэсгээр шороон шуурга шуурна.
Агаарын температур Увс нуурын болон Дархадын хотгор, Завхан голын эх, Идэр, Тэс, голын хөндийгөөр шөнөдөө -13…-18 градус, өдөртөө -3…-8 градус, Алтай, Хангай, Хөвсгөл, Хэнтийн уулархаг нутаг, Хүрэнбэлчир орчимоор шөнөдөө -9…-14 градус, өдөртөө -2…+3 градус, говийн бүс нутгийн өмнөд хэсгээр шөнөдөө +3…-2 градус хүйтэн, өдөртөө +12…+17 градус дулаан, говийн бүс нутгийн хойд хэсгээр шөнөдөө шөнөдөө 0…-5 градус хүйтэн, өдөртөө +8…+13 градус дулаан, бусад нутгаар шөнөдөө -5…-10 градус хүйтэн, өдөртөө +3…+8 градус дулаан байна.
