Ерөнхий сайд Г.Занданшатар өчигдөр Замын-Үүд суманд ажиллах үеэрээ авто замын боомтын зорчигч тээврийн цогцолбор болон ачаа тээвэр хилээр нэвтрүүлж буй үйл явцтай танилцсан.
Энэ үеэрээ Замын-Үүд дэх гаалийн газрын дарга О.Цэенрэгзэнг үүрэгт ажлаас нь чөлөөлөх чиглэл өгсөн байдаг. Улмаар өнөөдөр О.Цэенрэгзэнг үүрэгт ажлаас нь чөлөөлсөн байна. Мөн Ерөнхий сайд Замын-Үүд чөлөөт бүсийн үйл ажиллагаатай танилцав. 2004 оноос хойш үйл ажиллагаа явуулж буй тус бүсэд 104 аж ахуйн нэгж бүртгэлтэй ч ердөө 15 нь үйл ажиллагаа идэвхтэй явуулж байна. Чөлөөт бүсэд өдөрт дунджаар 400 гаруй хүн, 600 гаруй тээврийн хэрэгсэл зорчиж байгаа юм байна. 2025 онд 3.6 сая ам.долларын борлуулалт хийжээ.
