“Алтайн хүдэр” ХХК-ийн эзэн "баян" хочит Р.Базар болон түүнтэй холбоотой хэд хэдэн хүнийг өнгөрсөн оны дөрөвдүгээр сарын 15-ны өдөр /2024.04.15/ Эрүүгийн цагдаагийн албанаас баривчилж, улмаар цагдан хорьж мөрдөн шалгаж байсан билээ.
Гэсэн ч үүнээс нэг сарын дараа “Алтайн хүдэр” ХХК-ийн эзэн Р.Базар, тус компанийн В.Бат-Эрдэнэ нарыг суллаж, Монгол Улсын хилээр гарахыг хязгаарлах таслан сэргийлэх арга хэмжээ авсан байдаг. Тус хэргийг шалгах ажиллагаа өдгөө ч үргэлжилж байгаа гэдгийг албаныхан тодотгож байгаа.
Тэгвэл Р.Базарын "Алтайн хүдэр" ХХК-ийг Бүгд найрамдах Болгар улсын Гадаад яам иргэний хэргийн яам шүүх өгчээ.
Тодруулбал, Бүгд найрамдах Болгар улсын Гадаад яам иргэний хэргийн яамнаас "Алтайн хүдэр" ХХК-аас 4.9 тэрбум төгрөг гаргуулахаар шүүхэд хандсан байна. Тус хэргийг шүүх хурал өнгөрсөн гуравдугаар сарын 31-ний /2025.03.31/ өдөр болохоор товлогдоод байсан ч тодорхой шалтгааны улмаас ирэх сарын 08-ны /2025.05.08/ өдөр хүртэл хойшилжээ.
"Алтайн хүдэр" ХХК-ийн охин компани болох "Алтайн энержи ресурс" ХХК нь Монгол Улсад суугаа Болгар Улсын Элчин сайдын яамны цогцолбор барилгыг 2012 оноос эхлэн түрээслэн үйл ажиллагаа явуулж байсан аж.
Улмаар Бүгд Найрамдах Болгар улсын Гадаад харилцааны яамнаас 2016 онд түрээсийн гэрээний хугацааг сунгах боломжгүй, хугацаа дуусах өдөр байрыг чөлөөлж өгөхийг мэдэгдсэн байна. Гэвч тухайн компани болон "Алтайн хүдэр" ХХК нь Бүгд найрамдах Болгар улсын ЭСЯ-ны барилгаас гараагүй, үйл ажиллагаагаа явуулсаар байжээ. Тиймээс тус улсын Элчин сайдын яамнаас шүүхэд хандаж, уг асуудлыг шийдвэрлүүлэхээр болж байжээ. Гэсэн ч уг хэргийг анхан болон давж заалдах шатны шүүхээр хэд хэдэн удаа хэлэлцсэн ч эцэслэгдэн шийдэгдээгүй өнөөг хүрсэн учир Болгар улсын Гадаад яамнаас "Алтайн хүдэр" ХХК-аас 4.9 тэрбум төгрөг гаргуулахаар шүүхэд хандсан бололтой. Бид уг хэргийн талаар эргэн мэдээлэх болно.
