ВИДЕО: Х.Нямбаатар “Наран трейд”-н сургуулийн барилгыг авахын тулд "Захирал нь ирж уулзахгүй бол зөвшөөрлийг цуцална" гэж сагсуурчээ

Нийслэлийн засаг дарга Х.Нямбаатар сүүлийн үед ардчилсан нийгэмд байж боломгүй үг, үйлдэл гаргах болжээ. Тэрбээр хоёр хоногийн өмнө С.Болдхэт гэх хүнийг “21-р сургуулийн өмнө эзэмшиж байгаа газраа өг, үгүй бол бүх эрхийг нь цуцална” гэж мэдэгдсэн.

ВИДЕО:

-ХОТЫН ДАРГА Х.НЯМБААТАР ХУВИЙН ХЭВШЛИЙН ЭЗЭМШЛИЙН ГАЗРЫГ “ТӨРД АВНА” ГЭЖ ЯРИХ НЬ ҮНДСЭН ХУУЛЬ, ГАЗРЫН ТУХАЙ ХУУЛИЙГ ЗӨРЧСӨН ҮЙЛДЭЛ-

Тодруулбал, нийслэлийн удирдах ажилтнуудын шуурхай зөвлөгөөний үеэр Баянзүрх дүүргийн  21 дүгээр сургуулийн асуудал яригдсан. Энэ үеэр Хотын дарга Х.Нямбаатар "Хотын хэмжээнд хүн амын нягтшил ихтэй ч сургууль, цэцэрлэгийн хүртээмж тааруухан байршил нийслэлд хэд хэд бий. Үүний нэг нь Баянзүрх дүүргийн зургаадугаар хороо, 21-р сургуулийн асуудал. Тус хороо ганцхан сургуультай, сурагчид сургуульдаа багтахаа байсан. Хорооны оршин суугчид, эцэг, эхчүүд өөрсдөө шийдэл хайж, “Наран трейд”-ийн эзэмшлийн цэцэрлэгийн зориулалттай хуучны байрыг бага сургуулийн зориулалтаар ашиглах талаар хүсэлт гаргасан байдаг. Бид өнгөрсөн жил аж ахуйн нэгжтэй зөвшилцье, барилгыг нь худалдаж авъя гэдэг хүсэлтээ тавьсан.

Гэтэл тус аж ахуйн нэгжийн удирдлагууд 30 жил ашиглаагүй барилгаа заал болгоно хэмээн “хав дарчхаад” таг чиг сууж байгаа. С.Болдхэт гэдэг хүнийг олон удаа урилаа, ирдэггүй юм байна. Ирэхгүй томроод байгаа бол би ч гэсэн томорч чадна. Хүүхдийн төлөө хийж буй ажилд хамтарч ажиллахгүй бол тус аж ахуйн нэгжид хот байгуулалттай холбоотой шийдвэрүүдийг зогсоож, газрын зөвшөөрлийг цуцлах мэдэгдлүүдийг хүргүүлнэ. Ирж уулзвал уулзана биз, уулзахгүй бол тэр л биз. Сургуулийн хүүхдүүд багтахаа байчхаад байна" гэж мэдэгдсэн юм.

ВИДЕО: 

Энд Монгол Улсын Үндсэн хуулийн 16 дугаар зүйлийн гурав дахь хэсэгт заасан хүний өмчлөх эрхийн асуудал хөндөгдөнө. Нэгдүгээрт, Монголын төр иргэнээ дарамтлаад, “газар дээр барьсан объектоо төрд өг. Өгөхгүй бол бүх газрын эрхийг чинь цуцална” гэдэг байдлаар иргэнээ сүрдүүлж байгаа нь Үндсэн хуульд харшилж байна. Хоёрдугаарт, нийтийн албан тушаалтан хүн эрх мэдэл, албан тушаалын байдлаа ашиглаж олон нийтийн сүлжээгээр заналхийлсэн байж болзошгүй мэдэгдэл хийх нь магадгүй Эрүүгийн хуулийн 22 дугаар бүлэгт заасан гэмт хэргийн шинжтэй ч байж болох үйлдэл юм.

Мөн Газрын тухай хуульд заасан эзэмших эрхийг цуцлах үндэслэл ч энд байхгүй. Товчхондоо даргатай ирж уулзаагүй учраас эрхийг нь цуцална гэсэн заалт Монгол Улсын аль ч хуульд байхгүй.

-“НАРАН ТРЕЙД” ХХК УГ БАЙРШИЛД СУРГУУЛЬ, ЦЭЦЭРЛЭГ БАРЬЖ БАЙГАА БӨГӨӨД АШИГЛАЛТАНД ОРОХ ТУН ДӨХЖЭЭ-

“Наран трейд” ХХК-ийн ТУЗ-ын дарга С.Болдхэтийн эзэмшлийн 21-р сургуулийн урд талын газарт хуучнаар цэцэрлэг үйл ажиллагаагаа явуулдаг байсан бөгөөд одоогоор үйл ажиллагаа нь түр зогссон. Бид уг байршилд газар дээр нь очиход шинээр “Monte rosa technology school” нэртэй сургууль мөн цэцэрлэг барьж байгаа бөгөөд ашиглалтанд орох тун дөхжээ. Гэтэл Хотын дарга Х.Нямбаатар ашиглалтанд орох дөхсөн бусдын эзэмшлийн хувийн сургуулийг дээрэмдэж аваад, төрийн сургууль болгоно гэх.

Гэтэл энэ мэт ардчилсан бус, иргэдийн эрхийг зөрчсөн шийдвэр гаргахад олон нийт дургүйцэхээс илүүтэй дэмжиж хүлээж аваад байгаа нь өнөөдөр “Наран трейд” дээр магадгүй маргааш иргэн тан дээр ч бууж болох үзэгдэл байгаа юм. Мөн манай улс ардчилсан улс учир зах зээлийн эдийн засаг, хувийн өмчийг хүндэтгэх зарчим үйлчилдэг байх ёстой. Иймд нийтийн албан тушаалтан нь аль ч хувийн хэвшилд “том” болохоо харуулах биш, харин хуулийг шударгаар биелүүлэхийг шаардах ёстой. Нөгөөтэйгөөр хувийн хэвшил өөрийн өмчөө худалдах, худалдахгүй байх нь тэдний эрхийн асуудал билээ.