Өнөөдрийн Засгийн газрын ээлжит хуралдаанаар Уул уурхайн бүтээгдэхүүний экспортыг нэмэгдүүлэх, гадаад валютын улсын нөөцийн асуудал, Монгол Улсын нутаг дэвсгэрээр дамжуулан Оросын холбооны улсаас Бүгд Найрамдах Хятад Ард Улс руу байгалийн хий нийлүүлэх хоолой барих төслийн явц зэрэг 10 гаруй асуудлыг хэлэлцсэн юм.
Мөн манай улсын экспортын орлого сүүлийн долоо хоногт 270 гаруй сая ам.долларт хүрч өмнөх долоо хоногоос есөн хувиар өссөн байна. Экспортын орлогын өсөлттэй холбогдуулан гадаад валютын улсын нөөц 5 тэрбум ам.долларт хүрсэн нь сайн үр дүн байв.
Монгол Улс хоёр хөрш оронтой хил залгаа боомтуудын хөгжил, нэвтрүүлэх чадварыг нэмэгдүүлэх, төмөр замын төсөл бүхий эдийн засгийн коридор байгуулж, хийн хоолойг Монголын нутгаар дамжин өнгөрүүлэх төслийг эхлүүлж, байгалийн хийн нийлүүлэгч болон хэрэглэгч талуудтай эцсийн тохиролцоонд хүрсэн нь онцлох сайн мэдээ юм.
Ингэснээр манай улс нүүрс болон уул уурхайн бүтээгдэхүүний экспортыг нэмэгдүүлэх. Эрчим хүч, дэд бүтцийн салбарт хамтран ажиллах гээд гурван улс хоорондын төдийгүй бүс нутгийн хэмжээнд хамтран ажиллах боломжоо тодорхойлон ажиллах нөхцөл бүрдэж байна.
