Монгол Улсын Соёлын яамнаас соёл, урлагийн салбарыг хөгжүүлэх, олон талт хамтын ажиллагааг гүнзгийрүүлэх тэр дундаа Монголын соёлын өвийг дэлхий дахинаа сурталчлан таниулах чиглэлд олон улстай хамтран ажиллаж байна. Энэ хүрээнд Монгол Улсын музейн хөгжилд анхаарах, гадаад улсын музейтэй хамтын ажиллагааг хөгжүүлэх, харилцан туршлага судлах, хамтарсан төсөл хөтөлбөр хэрэгжүүлэн ажиллаж байна.
Энэ хүрээнд Швейцарын Холбооны Улсын Ритбергийн музейтэй Монгол Улсын Засгийн газрын хэрэгжүүлэгч агентлаг Соёл, Урлагийн газар хамтран ажиллах санамж бичиг байгуулсан. Санамж бичгийн хүрээнд Ритбергийн музейн төлөөллүүд өнгөрсөн оны 8-р сард Монгол Улсад айлчилж Үндэсний түүхийн музей, Чингис хаан Үндэсний музей болон Хархорум музейд зочилсон бөгөөд 2025 онд Швейцар Улсад "Монгол Улс евроазийн соёлын солилцооны төв болох нь" үзэсгэлэнг гаргахаар болсон.
Музейн хамтын ажиллагааны хүрээнд Соёлын сайд Ч.Номин Ритбергийн музейд зочлон тус музейн дэд захирал ноён Йоханнес Белцтэй уулзаж 2025 онд үзэсгэлэнгийн бэлтгэл ажил болоод хоёр орны музейн хамтын ажиллагаа, хамтран хэрэгжүүлэх төсөл хөтөлбөрүүдийн талаар санал солилцлоо. Түүнчлэн хамтран ажиллах санамж бичгийн хүрээнд музейн хөтөч, тайлбарлагчдыг чадавхжуулах, монгол үндэсний хувцас загварын талаарх үзэсгэлэнг хамтарч гаргах асуудал болоод талууд цаашид урт хугацаанд хамтран ажиллах боломжтой талаар санал солилцлоо.
