УИХ-ын чуулганы энэ долоо хоногийн нэгдсэн хуралдаанаар есөн хууль, тогтоолын төсөл хэлэлцэхээр товлосон байна.
Хэлэлцэх асуудлын жагсаалтын эхэнд Монгол Улсын Үндсэн хуульд оруулсан нэмэлт, өөрчлөлтөд хууль тогтоомжийг нийцүүлэх, түүнтэй холбогдуулан авах арга хэмжээний тухай тогтоолын төсөл, Мөнгө угаах болон терроризмыг санхүүжүүлэхтэй тэмцэх тухай хуульд нэмэлт, өөрчлөлт оруулах тухай, Монгол Улсын Ерөнхийлөгчийн сонгуулийн тухай хуулийн төсөл багтжээ.
Мөн чуулганаар Эрүүгийн хуульд нэмэлт, өөрчлөлт оруулах тухай, Байгалийн ургамлын тухай хуулийн шинэчилсэн найруулгын төсөл, Зарим газар нутгийг улсын тусгай хамгаалалтад авах, хилийн заагт өөрчлөлт оруулах тухай тогтоолын төслийг хэлэлцэнэ. Түүнчлэн Прокурорын байгууллагын 90 жилийн ойн баярыг тэмдэглэх тухай тогтоолын төсөл, Санхүүгийн зохицуулах хорооны зарим орон тооны гишүүнийг томилж, чөлөөлөх тухай хуулийн төслийг хэлэлцэхээр товложээ.
