Өнгөрсөн амралтын өдрүүдэд ихэнх нутгаар орсон цасан шуурганы улмаас Төв аймагт таван эмэгтэй, нэг эрэгтэй хүүхэд амиа алдсан талаар бид өмнө нь мэдээлсэн.
Тэгвэл эл харамсалтай ослын талаар Төв аймгийн Эрдэнэсант сумын ЗДТГ-ын дарга Б.Сарантуяа “Манай суманд 12 цаг орчим цасан шуурга шуурсан. Айлууд өвөлжөөнийхөө ойролцоо намаржаандаа бууцгаасан байсан. Тэгээд л янз янзын байдлаар малчид малдаа явганаар гараад хоёр гурваар хуваагдаж явах гэхчлэн янз бүрийн л шалтгаанаас болж зургаан хүн эндсэн. Шуурганаар харамсалтайгаар амиа алдсан малчид маань дандаа малаа тууж явсан байдалтай байсан.
Эндсэн нэг бүлийн хоёр хүн нь 11 настай хүүтэйгээ гарсан ээж байсан. Бусад нь дандаа гэр бүлийн 35-45 насны таван эмэгтэй байсан.
Мөн цаг агаарын аюулт үзэгдэлтэй гэж анхааруулаад байхад Улаанбаатар хотоос хөдөө орон нутагт ирж ажил хүндрүүлж байгаа зорчих хөдөлгөөний хүмүүс маш хэцүү байна. Энийг байгууллагууд анхаараач гэж хэлмээр байна. Бид шөнө бүхэл бүтэн засаг захиргааны бүрэлдэхүүнээрээ хүмүүсийг тосон авч дулаан оромжинд байрлуулах ажил хийж байна. Энэ явцад ирсэн хүмүүсийн дийлэнх нь хүүхэд байсан. Маш өндөр эрсдэлтэй юм хийж байгаагаа иргэд анхаармаар байна" гэжээ.
