Жил бүр өвлийн улирал эхлэхэд жолооч нар техникийн бүрэн бүтэн байдал болон шаардлага хангасан зориулалтын дугуйг цаг тухайд нь солилгүйгээр зам тээврийн хөдөлгөөнд оролцсоор байдаг нь өөрийн болон бусдын техник, эрүүл мэндийг эрсдэлд учруулж байгаа юм. Тэгвэл бид энэ удаа Тээврийн цагдаагийн албатай хамтран замын хөдөлгөөнд оролцож буй жолооч нар өвлийн дугуйгаа тавьсан эсэхийг шалгаж зөвлөмж өглөө.
11 дүгээр сарын 2-ны өдрийн байдлаар цаг агаар хүйтэн, нойтон цастай, зам мөстсөн байдалтай байхад хэт элэгдсэн эсвэл зуны дугуйтай замын хөдөлгөөнд оролцсон жолооч нар их байв. Тээврийн цагдаагийн албаны шалгалтаар арван машины найм нь шаардлага хангаагүй зуны дугуйтай замын хөдөлгөөнд оролцож байсныг тогтоосон юм. Мөн урдаа өвлийн дугуй хойноо зуны дугуй хийн замын хөдөлгөөнд оролцож буй тохиолдлууд ч байв.
Зам тээврийн хөдөлгөөнд шалгалт хийсэн Тээврийн цагдаагийн албаны Урьдчилан сэргийлэх хэлтсийн ахлах мэргэжилтэн Г.Отгонтамир "Суудлын автомашины дугуйны хээний гүн 1.6 мм байх ёстой бол зогсоосон жолооч нарынх энэ шаардлагыг хангахгүй байлаа. Өвлийн дугуй хэр нь 50 хувиас илүү илэгдсэн байдалтай байгаа нь ашиглахад их эрсдэлтэй юм. Учир нь энэ нь зогсоох арга хэмжээ авахад зам дээр барьцалдах үүргээ биелүүлэх боломжгүй, шарвалт үүсэх эрсдэлтэй болдог. Мөн замын халтиргаа гулгаа, гөөлөөний байдлыг илүү нэмэгдүүлдэг нь бусад зорчигчдын эрүүл мэнд, эд хөрөнгөд эрсдэлд оруулж буй хэрэг. Мөн иргэд та дугуй худалдаж авахдаа дугуйны хээ болон үйлдвэрлэсэн оныг сайтар анхаарах шаардлагатай. Үйлдвэрлэсэн он таван жилээс их тохиолдолд дугуйны чийгшил багасан замтай зууралдах чанар мууддаг юм. Дөрвөн улирлын дугуй нь Монголын хүйтэн өвөлд тохиромжгүй ба зууралдах чанар хангалтгүй байдаг. Иймд зориулалтын өвлийн дугуйг сонгож хэрэглэнэ үү!" гэж иргэдэд зөвлөгөө өгсөн юм.
Харин шаардлага хангаагүй дугуйтай замын хөдөлгөөнд оролцсон иргэдээс энэ талаар тодруулга авахад "Шаардлага хангаагүй дугуйтай оролцох нь ямар эрсдэлтэй талаар мэдэж байгаа, удахгүй солиулна" гэж хариулав.
Үргэлжлүүлэн дугуй засварын ажилтнаас иргэдийг хэзээнээс дугуйгаа солиулж эхэлж буй тухай асуухад "Анхны цас орсны дараа хүмүүс их ирж солиулж байна. Ес, аравдугаар сард ачаалал тийм их байгаагүй. Ер нь цагийг нь тулгаж солиулдаг" гэв.
