Б.Махбалыг сулласан Багануур дүүргийн Эрүүгийн хэргийн анхан шатны шүүхийн шүүгчийн захирамжийг эсэргүүцсэн прокурорын эсэргүүцлийг Нийслэлийн Давж заалдах шатны шүүх өчигдөр хэлэлцээд, анхан шатны шүүхийн шүүгчийн захирамжыг хүчингүй болгож, түүнийг нэн даруй цагдан хорихоор шийдвэрлэсэн талаар бид өмнө нь мэдээлсэн билээ.
Тэгвэл Б.Махбалыг өчигдөр орой /2023.10.26/ шүүхийн мэдэгдэх хуудсаар цагдан хорьсон байна. Тэрбээр прокурорын эсэргүүцэлд дурдснаар нэг сар 14 хоногийн дараа дахин магадланд орох эрхтэй болох юм. Ташрамд дурдахад, анхан шатны шүүхийн шүүгчийн захирамжийг эс зөвшөөрч дээд шатны прокурор бичсэн эсэргүүцэлдээ “... Монгол Улсын Ерөнхийлөгчийн зарлигаар ялтан Б.Махбалд оногдуулсан хорих ялаас 25 хувийг уучилсан. Шүүх энэхүү ялыг ялтны биеэр эдэлсэн ялд оруулан тооцож шийдвэрлэсэн нь үндэслэлгүй. ...” гэсэн байна. Өөрөөр хэлбэл Ерөнхийлөгчийн уучлал үзүүлсэн хугацааг биеэр эдэлсэн ялд оруулан тооцсон нь хууль зөрчсөн гэж үзсэн аж.
