МАН-ын генсек Д.Амарбаясгалангаас “тодорхойлолт аваад” хагартлаа баярлах С.Эрдэнэ, И.Мөнхжаргал нарыг Ч.Өнөрбаяр “жижиг” байна гэж жиргэжээ

С.Эрдэнэ болон Х.Баттулгын АН-ын И.Мөнхжаргал нар 2024 оны Улсын төсөв хэлэлцэж байгаатай холбогдуулж, “Ерөнхий сайд Л.Оюун-Эрдэнэд шаардлага” өгчээ. Тухайлбал, С.Эрдэнэ, “2023 оны Улсын төсвийг Засгийн газарт буцаах хэрэгтэй” гэж шаардсан бол, И.Мөнхжаргал, “тэтгэвэр тэтгэмжийг 2023 онд 40-өөс доошгүй хувиар нэмэгдүүл” гэж шаардаж.

-Д.АМАРБАЯСГАЛАНГИЙН ТОДОРХОЙЛОЛТЫН ДАГУУ С.ЭРДЭНЭ АЖЛЫН ХЭСЭГ БАЙГУУЛЖЭЭ-

Гэтэл ЗГХЭГ-ын дарга, МАН-ын Ерөнхий нарийн бичгийн дарга Д.Амарбаясгалан тэдний шаардлагын хариу болгож, “АН-ын дарга С.Эрдэнэ” танаа, “АН-ын ЕНБД И.Мөнхжаргал” танаа гэсэн хаягтай албан тоотыг хоёуланд нь илгээж, “Ажлын хэсэг байгуулж хамтран ажиллах нь зүйтэй гэж үзэж байна” гэжээ.  Гэтэл МАН-ын Ерөнхий нарийн бичгийн дарга Д.Амарбаясгалангаар “тодорхойлолт авсан” С.Эрдэнэ, И.Мөнхжаргал нар хагартлаа баярлаж, “намайг”, “намайг” албан ёсны АН гэж үзэж буй мэт мэдэгдлүүдийг ар, араасаа гаргасан байв.

Тухайлбал, С.Эрдэнийн АН-аас Д.Амарбаясгалангийн албан тоотын хариу болгож, “Үнэт зүйл үзэл баримтлалынхаа төлөө хүлээн зөвшөөрөгдсөн албан ёсны нам АН дээрээ нэгдэх нь чухал” гэж мэдэгдсэн, Х.Баттулгын АН-аас “Уг шаардлагын хариуг Монгол Улсын сайд, Засгийн газрын Хэрэг эрхлэх газрын дарга Д.Амарбаясгалан  өнөөдөр /2022.10.21/ ирүүллээ” гэсэн мэдээллийг нийтэлжээ.

Цаашлаад С.Эрдэнэ хамтарсан ажлын хэсэг байгуулах тушаал ч гаргаж, өөрийн хүрээллийн хүмүүсээ ч ажлын хэсэгт оруулжээ. Тодруулбал, С.Эрдэнийн тус албан тоотод ЗГХЭГ-ын даргын ХЭГ/2415 тоот албан бичгийг үндэслэн тушаах нь, Ажлын хэсгийн даргаар Д.Эрдэнэсувд, гишүүдээр Ц.Алтанцэцэг нарыг бүрэлдэхүүнтэй байгуулсугай, гүйцэтгэл сайтай ажиллаарай” гэсэн тушаалыг гаргажээ.

-АН-ЫГ С.ЭРДЭНЭ, Х.БАТТУЛГА НАР ЖИЖИГЛЭЖЭЭ-

Үнэндээ, өрсөлдөгч МАН-аас “тодорхойлолт” аваад ийнхүү мэдэгдэл хийж, баярлаж байгаа нь С.Эрдэнэ, Х.Баттулга нар АН-ыг хэрхэн жижиглэж, үгүй хийсний нэг илрэл юм.  Харин АН-ын Ерөнхий нарийн бичгийн дарга Ч.Өнөрбаяр, “Манай намын хэд МАН-ын генсекээр өөрсдийнхөө албан тушаалыг хүлээн зөвшөөрүүлэх гэсэн уралдаанд оролцож жижгэрч хэрэггүй ш дээ. Санаачилгаа өөрсдөө гартаа авъя” гэж мэдэгджээ.

Иймд МАН-ын Ерөнхий нарийн бичгийн дарга Д.Амарбаясгалан, “МУ-ын Ерөнхий сайдад хаяглан ирүүлсэн бүхий л хүсэлт, шаардлагуудад цаг хугацаанд нь хариу өгөх нь зүйн хэрэг юм.  ЗГХЭГ-аас аль намыг хэн төлөөлөх талаар дүгнэх боломжгүй тул асуудал дэвшүүлж хандсан албан тоотуудад аль алинд нь холбогдох хариуг ирүүлсэн хаягаар нь өгсөн болно” гэсэн тайлбарыг хийжээ.