Засгийн газрын өнөөдрийн ээлжит хуралдаанаас гаргасан шийдвэрийг танилцууллаа.
Энэ үеэр ХХААХҮ-ийн сайд З.Мэндсайхан, "Өнөөдрийн ээлжит хуралдаанаар ургац хураалтын чиглэлээр авах арга хэмжээний талаар хэд хэдэн шийдвэр гаргалаа. Энэ жил улсын хэмжээнд 368.4 мянган га дээр улаан буудай, 19.7 мянган га-д төмс, 10.9 мянган га-д хүнсний ногоо, 51.2 мянган га-д малын тэжээл нийт 570.8 га талбайд тариалалт хийгээд байна. Хаврын тариалалтын үед дизель түлшний литр тутмын үнэ 3380 төгрөг байсан бол өнөөдөр 4030 төгрөг буюу 19.6 хувиар өсөөд байна. Намрын ургац хураалтын ажилд 20-25 мянган тонн дизель түлш хэрэгтэй. Ургац хураалтын ажлын үед шатахууны үнийн өсөлтөөс хамгаалах зорилгоор 10 мянган тонн дизель түлшийг хаврын тариалалтын үнээр нийлүүлэх шийдвэрийг Засгийн газрын хуралдаанаас гаргалаа. Улаан буудай, төмс, хүнсний ногоо хураах ажилд зориулж шатахууны үнийн хөнгөлөлт үзүүлэх бөгөөд үүнд шаардлагатай 6.5 тэрбум төгрөгийг Засгийн газрын нөөц сангаас гаргахаар шийдвэрлэлээ" гэлээ.
