Богдхан уулын Дугуй цагаан руу явах зам баригдсан шавар гэрүүдийг нураасан талаарх сурвалжилга бэлтгэж байсан сэтгүүлч Г.Гэрэлмаагийн эрх чөлөөнд цагдаагийн алба хаагчид халдаж, тодорхой бус шалтгаанаар олон цаг саатуулж, эрүүл мэнд болон өмгөөллийн үйлчилгээ авах эрхийг нь хаасан ноцтой үйлдэл гарсан талаар мэдээлсэн.
Тэгвэл энэхүү үйл явдалтай холбогдуулж, Хууль зүйн сайд Х.Нямбаатарт сэтгүүлчээс уучлалт гуйж, хууль зөрчсөн цагдаагийн алба хаагчдад хариуцлага тооцно гэж мэдэгджээ.
Х.Нямбаатар;
Нийт сэтгүүлчдээсээ уучлал хүсье.
Цагдаагийн алба хаагчийн гаргасан хууль бус үйлдлийн өмнөөс сэтгүүл зүйн салбарт ажиллаж буй нийт сэтгүүлчид, зураглаач та бүхнээсээ уучлал хүсэж байна. Миний бие ардчилсан нийгмийн гол тулгуур болсон сэтгүүл зүй, хэвлэн нийтлэх эрхийг цаг ямагт хүндэтгэн ажиллаж ирсэн. Цаашид ч хүндэтгэн, хамгаалах болно.
Цагдаагийн алба, алба хаагч нь гэмт хэрэгтэй тэмцэх, нийтийн хэв журмыг хамгаалах, олон нийтийн аюулгүй байдлыг хангах үндсэн чиг үүргийг хэрэгжүүлэхдээ Монгол Улсын Үндсэн хууль болон бусад хуулийг чандлан сахиж ажиллах ёстой. Өөрөөр хэлбэл хүний эрх, эрх чөлөөг хүндэтгэн дээдэлж, хамгаалж, хүнлэг энэрэнгүй, ёс зүйтэй ажиллана гэсэн үг юм.
ХЗДХЯ болон Цагдаагийн байгууллагын удирдлагуудын зүгээс нийт цагдаагийн алба хаагчдын ёс зүй, мэргэжлийн харилцаа, хандлагыг хөгжүүлэх сургалт, судалгаа тасралтгүй зохион байгуулдаг. Энэ удаа ч мөн дээрх цогц арга хэмжээнүүдэд онцгой анхаарч ажиллах талаар холбогдох этгээдүүдэд үүрэг, чиглэл өгч байна. Хүний эрхийг зөрчиж, сэтгүүлчидтэй зүй бус харьцсан, хууль бус үйлдэл гаргаж, өргөсөн тангаргаасаа няцсан алба хаагчид холбогдох хууль тогтоомжийн дагуу хариуцлага тооцох болно" гэж цахим хуудастаа бичжээ.
