Улсын бүртгэлийн ерөнхий газар /УБЕГ/-аас АН-ын даргын үүрэг гүйцэтгэгч Ц.Тувааны хэрэглэж байсан 1117237845 дугаартай тамгыг хүчингүй болгож, улмаар АН-ын 9020120477 дугаартай шинэ тамгыг Улсын бүртгэлд шинээр бүртгэгдсэн байдаг.
Иймд Ц.Туваан нарын зүгээс УБЕГ-ын дээрх шийдвэрийг эсэргүүцэж, Захиргааны хэргийн шүүхэд хандсан байна.
Тэгвэл өнөөдөр /2022.06.07/ Нийслэл дэх Захиргааны хэргийн анхан шатны шүүхийн 128/ШЗ2022/4868 дугаар шүүгчийн захирамжаар Захиргааны хэрэг шүүхэд хянан шийдвэрлэх тухай хуулийн 109 дүгээр зүйлийн 109.2, 54 дүгээр зүйлийн 54.1.5 дахь хэсэгт зааснаар нэхэмжлэгч Ардчилсан намаас “Улсын бүртгэлийн ерөнхий газрын хяналт шалгалтын газрын улсын байцаагчийн 2020 оны 12 дугаар сарын 24-ний өдрийн “Тамга тэмдгийн хяналтын дугаарыг хүчингүй болгох тухай” 6030 дугаар дүгнэлт болон улсын бүртгэгчийн 2020 оны 12 дугаар сарын 25-ны өдрийн Тамга тэмдгийн хяналтын дугаарын улсын бүртгэлийн хуудсаар тамга, тэмдгийн 9020120477 хяналтын дугаар дахин олгосон шийдвэрийг тус тус илт хууль бус болохыг тогтоолгох” нэхэмжлэлийн шаардлага бүхий захиргааны хэргийг хэрэгсэхгүй болгож, нэхэмжлэлийг хүлээн авахаас татгалзаж шийдвэрлэсэн гэж Нийслэл дэх захиргааны хэргийн анхан шатны шүүхийн тамгын газраас мэдээлжээ.
