“Maxar Technologies” компани Мариуполь хотын төв хэсэгт тохиосон сүйрлийг харуулсан хиймэл дагуулын шинэ зургуудыг нийтэлжээ. Хотын төвд олон арван барилга сүйрч, эргэн тойронд нь дэлбэрэлтийн ул мөр үлдсэн байна.
Бөмбөгдөлт болсон драмын театрын зүүн талд Оросын халдлагын улмаас 300 орчим хүн амиа алдсан гэж Украины эрх баригчид үзэж буй. Хиймэл дагуулын зурагт драмын театрын дээвэр нь тэр чигтээ нурж, эргэн тойрны байшингууд сүйдсэн болохыг харуулжээ.
Зүүн Мариуполийн суурьшлийн бүсэд хоёр тусдаа орон сууцны хороолол, эргэн тойрны барилгууд сүйрчээ.
Мариуполь дахь Метро супермаркетийн гадаа олон зуун хүн цугларч, барилга руу орохоор оочерлож буй нь. Супермаркетийн дээвэрт цохилтын улмаас нүх үүсжээ. Мариуполь хотын захирагчийн тооцоолсноор одоогоор тус хотод 160 мянган хүн үлдсэн байна.
Хотын зүүн хойд талд Оросын цэргийн техникүүд байрласан нь дээрх зурагт харагдаж байна. Мөн машинуудын хажууд их буу байрлажээ.
