Коронавирусын халдвар авсан төгсөн ангийн сурагчдыг Элсэлтийн ерөнхий шалгалтад хамруулахгүй, нэг жил өнжөөнө гэх мэдээллийг Боловсролын үнэлгээний төвөөс мэдэгдсэн. Тэгвэл уг асуудлаар Боловсрол, шинжлэх ухааны сайд Л.Энх-Амгалан мэдээлэл хүргэлээ.
Тэрбээр "ЭЕШ өгөхөөр бүртгүүлсэн нэг ч хүүхдийг шалгалтаас гадуур үлдээхгүйг хариуцлагатайгаар мэдэгдье. Боловсролын үнэлгээний төвийн зарим албан тушаалтан хариуцлагагүй, ойлгомжгүй мэдэгдэл хийснээс болж иргэдийн дунд бухимдал үүсээд байна. Энэ албан тушаалтанд хариуцлага тооцно.
Тодруулбал, тавдугаар сарын 20-ноос өмнө Элсэлтийн ерөнхий шалгалтын бүртгэл дуусаж, 40, 420 хүүхэд шалгалтад орохоор бүртгүүлсэн бөгөөд хэн, аль сургууль дээр очиж шалгалтаа өгөх нь тодорхой болчихсон.
Дээрх хүүхдүүдээс 2,000 орчим нь коронавируст халдварын сэжигтэй тохиолдол болсон бөгөөд 1,500 нь эмнэлэгт хэвтэн эмчлүүлж байгаа юм.
Би Боловсрол, шинжлэх ухааны сайдын хувьд хэлэхэд, энэ жил Элсэлтийн ерөнхий шалгалтад орохоор бүртгүүлсэн бүх хүүхдэд боломж олгоно.
Өөрөөр хэлбэл, ЭЕШ өгөхөөр бүртгүүлсэн нэг ч хүүхдийг бид шалгалтаас гадуур үлдээхгүйг хариуцлагатайгаар мэдэгдье. Бид улсын хэмжээнд ЭЕШ авах 48 төвийг бэлдсэн. Нэг ангид 15-аас дээшгүй хүүхдийг оруулах бөгөөд тухайн төвүүдэд гурван төрлийн анги бэлдсэн.
Тодруулбал,
-Халдваргүй хүүхдүүд шалгалт өгөх боломжтой анги,
-Тухайн өдөр өндөр халуунтай буюу халдварын сэжигтэй хүүхдүүдийн шалгалт өгөх анги,
-Хамгийн сүүлд коронавирусийн халдвараар өвчилсөн байгаа хүүхдүүдийг шалгалтын төвүүд дээр авчраад шалгалт өгүүлэхээр танхим бэлдсэн байгаа.
Түүнээс гадна, сэжигтэй эсвэл халдварын улмаас гэртээ эсвэл эмнэлэгт эмчлүүлж байгаа хүүхдүүдэд Ipad хүргэж өгөөд хяналтын камерын тусламжтайгаар байгаа газар нь ЭЕШ авах боломжийг туршиж байна.
Хэрвээ энэ туршилт амжилттай болбол бид ирэх долоо хоногт үүнийг нэвтрүүлнэ гэж тооцоолж байгаа.
ЭЕШ улс орон даяар нэг өдөр болдог тул нэг ч хүүхэд түүнээс хоцрох ёсгүй. Тиймээс хүүхдүүдийн дунд халдвар илүү өсөж, УОК-оос хөл хорио тогтоох эрсдэл үүсвэл хүссэн хүсээгүй ЭЕШ-ыг хойшлуулахаас өөр аргагүй” гэлээ.
ҮЗЭХ:
