Энэ сарын 9-ны өдөр /2021.06.09/ 16:22 цагт БНСУ-ын Гванжу хотод дахин төлөвлөлтөнд орж байсан Хак-донг дүүргийн 5 давхар орон сууцыг буулгаж байх үеэр зургаан эгнээтэй засмал замын эхний эгнээнд зогсож байсан автобусны дээрээс нуран, автобусанд явж байсан есөн хүн амь насаа алдаж, найман хүн хүнд гэмтэл авсан харамсалтай хэрэг гэрчээ. Тухайн үед амь насаа алдсан ихэнх зорчигчид автобусны арын суудалд суусан байжээ.
Гал унтраах албанаас мэдээлж буйгаар “Барилга нурахаас өмнө уг талбайн дотор байсан ажилчид ослын газраас зугтсан гэж үзэж байна. Одоогийн байдлаар амиа алдсан болон шархадсан хүмүүс бүгд автобусны зорчигчид болохыг тогтоогоод байна”гэжээ.
Цагдаагийн байгууллагаас ослын талаар мөрдөн байцаах баг байгуулж, 10-ны өдрийн 13 цагт ослын газарт Эрдэм шинжилгээний үндэсний хүрээлэн болон бусад холбогдох байгууллагуудтай хамтран шүүх шинжилгээ хийх болно гэж мэдэгджээ.
