УИХ-ын гишүүн Ө.Шижир Ардчилсан намын даргад нэр дэвших хүсэлтээ өглөө.
Энэ үеэр тэрбээр " Ардчилсан намын даргад нэр дэвших хүсэлтээ албан ёсоор өгчихлөө. Нээлттэй уулзалтын үеэр миний хэлсэн үгийг сонссон байх. Өнөөдөр манай нам өөрийн гэсэн байргүй байна. Мөн албан ёсны ерөнхий нарийн бичгийн даргагүй таван жил байж байгаад саяхан л даргатай боллоо. Энэ түүхийг бид давтаж болохгүй. Тиймээс эхлээд дүрмээ дараа нь даргаа яръя гэдэг байр суурьтай байгаа. Манай нам Их хурлаа хийхдээ намын даргад нэр дэвшигчдээс зардлыг нь гаргуулж байна. Энгийнээр ярьвал компани хувьцаа эзэмшигчдийнхээ хурлыг хийхдээ хувьцаа эзэмшигчдээсээ мөнгө авдаггүй шүү дээ. Гэтэл нэр дэвшигчдийг Их хуралд зарцуулах зардлыг гарга гэж байна. Сүүлийн 15 жил ийм байсан Ардчилсан намд өөрчлөлт шинэчлэл хэрэгтэй. Сүүлийн гурван сонгууль дараалж бид ялагдлаа. Одоо ялдаг нам болох хэрэгтэй. Гишүүдээ шинэчлэх хэрэгтэй. Дундговь аймгийн Сайнцагаан суманд байгаа намын гишүүнээс саналыг нь авах ёстой. Тэр хүн Ардчилсан намынхаа дүрэмд саналаа өгсөн гэсэн итгэл үнэмшилтэй үлдэх хэрэгтэй. Тэгэхгүй бол 100 гаруйхан хүний дунд асуудлыг хэлэлцээд дүрмээ ярьдаг байж болохгүй. Өчигдөр намын даргын өргөдлийг хэлэлцэх үед ҮБХ-ны 247 гишүүн бүтнээрээ байсан. Намын үндсэн дүрэм хэлэлцэхэд 100 хүрэхгүй хүн үлдсэн. Ийм байдлыг өөрчлөх, шинэчлэх ёстой. Лодойсамбуу, Мөнхбаясгалан нарын гишүүнийг ҮБХ-нд дөрвөн жил байгаагүй гэх шалтгаанаар хассан. Үндсэн дүрмээс давсан журам гаргаад тэр журмаараа хассан. Уг нь бид илүү олон хүнд хаалгаа нээх ёстой. Залууст боломж олгох ёстой" гэлээ.
ВИДЕО:
.jpg)
