Нийслэлийн Иргэдийн Төлөөлөгчдийн Хурал дахь Монгол Ардын Намын бүлэг өнөөдөр хуралдаж, Нийслэлийн Засаг дарга бөгөөд Улаанбаатар хотын Захирагчид нэр дэвшигчийн асуудлыг хэлэлцлээ.
Хурлаар МАН-ын Удирдах зөвлөл болон Нийслэлийн МАН-ын хорооноос МАН-ын Удирдах зөвлөлийн гишүүн, нарийн бичгийн дарга Б.Пүрэвдагвыг нийслэлийн Засаг даргад нэр дэвшүүлснийг танилцуулан хэлэлцсэн байна. Улмаар НИТХ дахь МАН-ын бүлгийн гишүүдийн 100 хувийн саналаар Б.Пүрэвдагвыг дэмжжээ. НИТХ дахь МАН-ын бүлгийн хуралдаан өндөрлөснөөр уг асуудлыг НИТХ-ын хуралдаанаар хэлэлцэж, дараагийн шатанд Ерөнхий сайдад уламжлах юм.
