Сан-Францискогийн буланд орших, өдгөө жуулчдын очих дуртай газар болоод буй Алькатрас арлыг эргүүлэн шоронгийн зориулалтаар ашиглалтад оруулахын тулд Цагаан ордон 152 сая ам.долларын санхүүжилт хүсжээ. Цагаан ордноос баасан гарагт танилцуулсан 2027 оны санхүүгийн жилийн төсвийн төсөлд уг зардлыг тусгасан байна.
Хэдийгээр Ерөнхийлөгчийн засаг захиргаа төсвийн саналаа ийнхүү хүргүүлдэг ч Конгрессын хууль тогтоогчид үүнийг ихэвчлэн зөвлөмж төдийхнөөр хүлээн авагддаг аж. Төсвийн төсөлд дурдсанаар, Холбооны хорих ангиудын товчоонд олгох тус хөрөнгийг Алькатрасыг “орчин үеийн технологиор хамгаалсан шоронгийн цогцолбор” болгон шинэчлэх эхний зардалд зарцуулахаар төлөвлөжээ. Одоогийн байдлаар Үндэсний цэцэрлэгт хүрээлэнгийн харьяанд байдаг тус байгууламжийг 1969 онд хаасан байна. Д.Трамп өнгөрсөн тавдугаар сард олон нийтийн сүлжээгээр дамжуулан “Америкийн хамгийн хэрцгий, аюултай гэмт хэрэгтнүүдийг хорихын тулд Алькатрасыг өргөтгөн шинэчилж, дахин нээх” үүргийг Хууль зүйн яам болон холбогдох агентлагуудад өгснөө мэдэгдсэн юм. Анх 1934 онд нээгдсэн Алькатрас нь далайн хүйтэн ус, хүчтэй урсгал бүхий арал дээрх байрлалаасаа шалтгаалан АНУ-ын хамгийн найдвартай, чанга дэглэмтэй шоронд тооцогддог байв. Тэндээс нэг ч хоригдол оргож чадаагүй гэж албан ёсны бүртгэлд тэмдэглэгдсэн байдаг боловч таван хоригдол сураггүй болсныг живсэнд тооцдог байна. Тус шоронд Аль Капоне, Жеймс "Уайти" Булжер зэрэг зартай гэмт хэрэгтнүүд хоригдож байжээ. Шоронгуудын товчооны цахим хуудаст тэмдэглэснээр, Алькатрасыг ажиллуулах зардал нь бусад шоронгуудаас бараг гурав дахин их байсан тул эдийн засгийн үр ашиггүй гэж үзэн үйл ажиллагааг нь зогсоосон байна.
