Өнөөдөр /2025.10.16/ өглөө болсон Төрийн байгуулалтын байнгын хорооны хурлаар Ерөнхий сайд Г.Занданшатарыг огцруулах саналыг 86 хувь нь "дэмжихгүй" гэсэн санал өгсөн. Тодруулбал, Ерөнхий сайд Г.Занданшатарыг огцруулах саналыг гаргасан Д.Амарбаясгалангийн талын гишүүд Засгийн газрыг огцруулахыг "дэмжихгүй" гэсэн саналыг байнгын хороо дээр өгсөн юм. 

Учир нь Д.Амарбаясгалангийн талын УИХ-ын гишүүдийн кноп Г.Занданшатарыг огцруулахад чуулган дээр хүрэхгүй байгаа тул Төрийн байгуулалтын байнгын хорооны саналыг парламент дээр унагаад Засгийн газрыг огцруулна гэж тооцож байгаа бололтой. 

Тэгвэл Засгийн газрыг огцруулахыг "дэмжихгүй" гэсэн Төрийн байгуулалтын байнгын хорооны саналыг "дэмжье" гэсэн саналын томьёоллоор санал хураалт явуулбал Г.Занданшатарын талын УИХ дахь МАН-ын бүлгийн 38 гишүүн чуулганы хуралдаанд оролцохгүй. Энэ нь Үндсэн хуулийн бус аргаар Засгийн газрыг огцруулах гэж байна хэмээн мэдэгдлээ.

ВИДЕО: 

Учир нь Төрийн байгуулалтын байнгын хорооны санал дүгнэлт хэрхэн гарснаас үл хамаарч УИХ-ын нэгдсэн чуулганы хуралдаанаар "Засгийн газрыг огцруулъя" гэсэн саналын томьёоллоор санал хураах Үндсэн хуулийн заалттай. Харин УИХ-ын чуулганы хуралдаан даргалагч Төрийн байгуулалтын байнгын хорооны саналыг дэмжье гэдгээр санал хураалгавал өөрөө Үндсэн хууль зөрчиж парламентын гишүүнээс эргүүлэн татагдах юм. 

Төрийн байгуулалтын байнгын хороо өнөөдөр өглөө 09.00 цагт хуралдаж Ерөнхий сайд Г.Занданшатарыг огцруулах асуудлыг үргэлжлүүлэн хэлэлцлээ.

Ингээд "Монгол Улсын Ерөнхий сайд Г.Занданшатарыг огцруулах саналыг дэмжье" гэсэн саналын томьёоллоор санал хураалт явууллаа. Санал хураалтад 22 гишүүн оролцсоноос 19 гишүүн буюу 86 хувь огцруулахыг дэмжсэнгүй. Харин гурван гишүүн буюу 13.6 хувь нь зөвшөөрлөө.  Байнгын хорооны санал дүгнэлтийг УИХ-ын чуулганы нэгдсэн хуралдаанд ТББХ-ны дарга Ц.Сандаг-Очир танилцуулахаар боллоо. Одоо уг асуудлаар УИХ-ын нэгдсэн чуулган хуралдана. Сонирхуулахад, Төрийн байгуулалтын байнгын хорооны "дэмжихгүй" гэсэн саналыг "дэмжье" гэсэн саналын томьёоллоор санал хураалт явагдах бололтой. 

ВИДЕО: 

УИХ-ын Төрийн байгуулалтын байнгын хорооны энэ сарын 10-ны өдрийн хуралдаанаар /2025.10.10/ Ерөнхий сайд Г.Занданшатарыг огцруулах асуудлыг хэлэлцэж эхэлсэн. Гишүүд ирцээ бүртгүүлж Ерөнхий сайдаас асуулт асууж, хариулт авч дууссаны дараа  ажлын цаг дууссан гэх шалтгаанаар тус хуралдааныг даваа гарагийн 11.00 цаг хүртэл хойшлуулаад байсан юм.

Харин даваа гарагт тус  байнгын хороо үргэлжлүүлэн хуралдаж, гишүүд үгээ хэлж, санал хураах байсан ч ирцэнд бүртгүүлсэн гишүүд танхимд орж ирээгүй гэх шалтгаанаар тус байнгын хорооны дарга Ц.Сандаг-Очир хуралдааныг Дэгийн хууль зөрчин хааж, тодорхойгүй хугацаагаар хойшлуулсан байдаг.

Тэгвэл Төрийн байгуулалтын байнгын хороо өнөөдөр 09.00 цагт хуралдаж, Ерөнхий сайдыг огцруулах асуудлыг хэлэлцэхээр товложээ. Үргэлжлүүлэн 10.00 цагаас чуулганы хуралдаанаар тус асуудлыг хэлэлцэж шийдвэрлэх юм. Учир нь Ерөнхий сайдыг огцруулах саналыг энэ сарын 07-ны өдөр УИХ-ын дэд дарга Х.Булгантуяад өргөн барьсан. Монгол Улсын Үндсэн хуульд зааснаар Ерөнхий сайдыг огцруулах саналыг албан ёсоор тавьснаас хойш 10 хоногийн дотор шийдвэрлэх ёстой. Өргөн барьсан өдрөөс тоолж үзвэл маргааш буюу /2025-10-17/-нд дуусна.

Хуулийн заалт: Монгол Улсын Үндсэн Хуулийн 43-р зүйл

1.Улсын Их Хурлын гишүүдийн дөрөвний нэгээс доошгүй нь Ерөнхий сайдыг огцруулах саналыг албан ёсоор тавибал Улсын Их Хурал гурав хоногийн дараа хэлэлцэж эхлэн арав хоногийн дотор шийдвэрлэнэ. Улсын Их Хурлын нийт гишүүний олонхи уг саналыг дэмжсэн бол Ерөнхий сайдыг огцруулах тухай Улсын Их Хурлын тогтоол баталсанд тооцож, шинэ Ерөнхий сайдыг гуч хоногийн дотор томилно.

2.Ерөнхий сайд огцорвол Засгийн газар бүрэлдэхүүнээрээ огцорно.