УИХ-ын чуулганы өнөөдрийн /2025.05.01/ нэгдсэн хуралдаан 10:00 цагт эхэлсэн боловч хуралдааны эхэнд УИХ дахь АН-ын бүлгийн дарга О.Цогтгэрэл Ерөнхий сайдад хүргүүлсэн шаардлагынхаа хүрээнд нэгдсэн хуралдаанаас гурван хоногийн завсарлага авах санал гаргасан.
Учир нь өнгөрсөн долоо хоногийн баасан гарагийн чуулганы хуралдааны үеэр Ерөнхий сайд Л.Оюун-Эрдэнэ УИХ-ын гишүүн Ж.Баярмаагийн асуултад улс төржсөн байдлаар хариулж, хэл амаар доромжилсон. Үүнтэй холбоотойгоор УИХ дахь АН-ын бүлэг Ерөнхий сайдыг УИХ-ын гишүүн Ж.Баярмаа болон УИХ-аас уучлалт гуйхыг шаардаж, шаардлагыг биелүүлэхгүй бол УИХ-ын чуулганы хуралдаанаар хэлэлцэх асуудлаас завсарлага авна цаашлаад бойкотлоно гэсэн юм. Энэ дагуу өнөөдрийн чуулганы хуралдаанаас АН-ын бүлэг гурав хоногийн завсарлага хүссэн ч УИХ-ын дарга Д.Амарбаясгалан нэг хоногийн завсарлага өгсөн юм.
Тэгвэл УИХ дахь АН-ын бүлэг ээлжит бусаар яг одоо хуралдаж байна. Хуралдаан ширүүн уур амьсгалтай болж буй талаар эх сурвалж мэдээллээ. Тодруулбал, хамтарсан Засгийн газрын найман гишүүн АН-ын бүлгийн дээрх шийдвэрийг шүүмжилж үүнээс үүдэн хоорондоо маргалджээ.
Өнгөрсөн даваа гарагийн бүлгийн ээлжит хуралд Засгийн газрын найман гишүүн оролцоогүй бөгөөд өнөөдрийн хуралд оролцож ийнхүү саналаа илэрхийлж байгаа гэв.
