Хаврын чуулган эхлээд хоёр долоо хоног өнгөрсөн ч улс төр "халуун" өрнөж байна. ЗГХЭГ-ын дарга Н.Учрал Ерөнхийлөгч асан Х.Баттулгын хятадуудад зарсан гэх "Төгрөг нуурын орд"-ын асуудлыг хөндөж, тус ордыг стратегийн ордод бүртгэнэ, 34 хувийг төрд авах хэлцлийг эхлүүлнэ, зуурсан бантангаа засах 7 хоногийн хугацаа өгье гэж мэдэгдсэн нь өнгөрсөн долоо хоногийн онцлох үйл явдал боллоо.
Үүнтэй зэрэгцэн Хууль зүй, дотоод хэргийн сайдаар ажиллаж байсан УИХ-ын гишүүн Б.Энхбаяр Сангийн сайд Б.Жавхланг хоригдол найз Д.Батдөлийгөө Төр хурхын аманд амраадаг зэргээр ярьсан нь мөн анхаарал татаж, улс төрд ямар үйл явдал эхлэх гээд байна гэх хардлагыг төрүүлэв.
-Т.МӨНХСАЙХАН ЮУ Ч ХЭЛЭЛГҮЙ ЧИМЭЭГҮЙ ӨНГӨРСӨН БОЛ Ч.НОМИН САНАЛЫГ НЬ ХҮЛЭЭЖ АВААД АЖЛАА ӨГӨХӨД БЭЛЭН ГЭЖЭЭ. ХАРИН САНГИЙН САЙД Б.ЖАВХЛАН "БИ АЖЛАА ӨГӨХГҮЙ. ӨГӨХ ҮНДЭСЛЭЛ Ч БАЙХГҮЙ" ЗЭРГЭЭР БУХИМДЖЭЭ-
Тэгвэл энэ бүх үйл явдал нь Сангийн сайд Б.Жавхлан, Эрүүл мэндийн сайд Т.Мөнхсайхан, Соёл, спорт, аялал жуулчлал, залуучуудын сайд Ч.Номин нарт хариуцлага тооцож огцруулах асуудлаас эхлэлтэй аж.
Тодруулбал, өнгөрөгч Даваа гарагт /2025.03.31/ Ерөнхий сайд Л.Оюун-Эрдэнэ дээрх гурван сайдтай уулзаж, "Ажлаа өгчих" гэх товчхон агуулгаар яриа өрнүүлсэн байна.
Хариуд нь Т.Мөнхсайхан юу ч хэлэлгүй чимээгүй өнгөрсөн бол Ч.Номин саналыг нь хүлээж аваад ажлаа өгөхөд бэлэн гэжээ. Харин Сангийн сайд Б.Жавхлан "Би ажлаа өгөхгүй. Өгөх үндэслэл ч байхгүй" зэргээр бухимдаж, цамнажээ. Харин Ерөнхий сайд Л.Оюун-Эрдэнийн хувьд эдийн засгийн нөхцөл байдал хүндэрсэн цаашид ч илүү хүндрэх бодит эрсдэл тулгарсан учир Засгийн газраа бодоод ажлаа өгчих гэх тулгалтыг хийсэн гэх. Энэ нь түүний Засгийн газраа авч үлдэх тактик бөгөөд иргэд бухимдаж хариуцлага ярих бүрт хоёроос гурван сайдтайгаа хариуцлага тооцож аргалах нь гэх хардлагыг төрүүлж байна.
-НӨГӨӨ ТАЛД ЖЕНКО Х.БАТТУЛГЫНХАН ЗАСГИЙН ГАЗРЫГ ОГЦРУУЛАХААР ХӨДӨЛЖ ЭХЭЛСЭН БӨГӨӨД ХАРИУД НЬ "ТӨГРӨГ НУУРЫН ОРД"-ЫГ СӨХСӨН БАЙХ МАГАДЛАЛТАЙ-
2024 оны сонгуулийн үр дүнгээр УИХ 126 гишүүнтэй болж МАН, АН, ХҮН, Үндэсний эвсэл, Ногоон намаас бүрдсэн парламентыг байгуулсан. Эдгээрээс МАН, АН, ХҮН нийлж хамтарсан Засгийн газрыг өнгөрсөн долдугаар сард байгуулсан бөгөөд гэрээний дагуу Л.Гантөмөр, Т.Доржханд тэргүүтэй хүмүүстэйгээ хариуцлага тооцож чадахгүй нь мэдээжийн асуудал юм. Тиймээс хамгийн сул гэх Т.Мөнхсайхан, Ч.Номин нараас хариуцлагыг эхлүүлье гэсэн ч энэ нь хариуцлага тооцсон шиг болж иргэдэд хүрэхгүй тул Сангийн сайдаа хавчуулах бодол төрсөн нь энэ аж.
Б.Энхбаяр ч уг үйл явдалтай холбоотойгоор хурц, хурц ярьж эхэлсэн байна. Энэ яриа хэрхэн үргэлжлэхийг ирэх өдрүүдийн үйл явдал харуулна. Нөгөөтэйгүүр дээрх гурван сайд нь "Ерөнхийлөгчийн хүмүүс" гэж улс төрийн хүрээнд яригддаг билээ.
Мөн нөгөө талд Женко Х.Баттулгынхан Засгийн газрыг огцруулах акцыг эхлүүлсэн бөгөөд ХҮН-ын Т.Доржхандыг сүү горьдсон гөлөг зэргээр ярьж эхлэсэн нь ч үүнтэй холбоотой аж. Үүний хариу болгож "Төгрөг нуурын орд"-ыг сөхсөн байх магадлалтай бөгөөд Ерөнхийлөгч У.Хүрэлсүх, УИХ-ын дарга Д.Амарбаясгалан нар хаана орж тоглохоос шалтгаалж Засгийн газрын хувь заяа шийдэгдэнэ. Ямартай ч энэ бүх үйл явдал нь Засгийн газарт хөдөлгөөн орох, эвгүйтсэн гэдгийг илтгэнэ.
.jpg)
