УИХ-ын чуулганы нэгдсэн хуралдаанаар Зөвшөөрлийн тухай хуульд нэмэлэт, өөрчлөлт оруулах тухай хуулийн төслийг хэлэлцэж байна. Хуулийн төслийн агуулга нь төлбөрт таавар, бооцоот тоглоом, цахим мөрийтэй тоглоомыг бүхэлд нь хориглох тухай юм.
Хэлэлцүүлгийн үеэр УИХ-ын гишүүн С.Бямбацогт "Цахим мөрийтэй тоглоомыг анхаарч үзэх цаг нь болсон. 1.3 тэрбум ам.доллар буюу 4.5 их наяд төгрөг сүүлийн таван жилд гараад явчихсан байна. Үүнийг маш энгийнээр тооцож тайрлахад, приус машин 30 сая төгрөгийн үнэтэй гэж үзвэл 150 мянган приус машинтэй тэнцэх хэмжээний мөнгө гадагшаа гараад явчихаж. 150 мянган айл өрх машингүй болчихож. Орон сууцаар тооцвол, 100 сая төгрөгийн үнэтэй 45 мянган орон сууц. 45 мянган айл мөрийтэй тоглоомын үр дүнд орон гэргүй болсон гэсэн үг. 2024 онд 500 сая ам.доллар гарсан гэж байна. Энэ нь 50 мянган приус машин. Ийм л ноцтой асуудал учраас хууль баталж хориглох нь зөв" гэлээ.
