Засгийн газрын өнөөдрийн /2025.04.02/ хуралдаанаас гаргасан шийдвэрийг танилцуулж байна.
ВИДЕО:
Энэ үеэр Сангийн сайд Б.Жавхлан "Засгийн газрын дан нөөц эсвэл Төв банкны дан нөөц гэж байдаггүй. Төв банканд Монгол Улсын валютын нөөц л гэж байдаг. Засгийн газар болон санхүүгийн зах зээлийн бүх институцууд хамтарч ажилладаг хуулийн дагуу үндсэн платформ байдаг. Тэр нь санхүүгийн тогтвортой байдлын зөвлөл гэх институц юм.
Өнгөрсөн хоёр долоо хоногийн хувьд бид нөөцөө нэмэгдүүлэх ажлыг хоёр хэсэгт агуулгаар нь харж байна.
-
Биет хэмжээ буюу экспортоо нэмэгдүүлэх
-
Санхүүгийн зах зээл дээрх нөөц боломжоо дайчилж, валютын нөөцийг нэмэгдүүлэх
Мөн өнгөрсөн долоо хоногт манай улсын гол түүхий эдүүдийг худалдан авагч талуудтай уулзалт зохион байгуулсан. Бирж дээр гарч буй журмын зохицуулалтын өөрчлөлтийг танилцууллаа. Мөн биржийн хуулийг өргөн барьсан, үүнд ямар өөрчлөлтүүд орж байгаа талаарх мэдээллүүдийг өгч ажилласан. Гуравдугаар сарын 13-нд ажлын хэсэг байгуулагдсанаас хойш тогтвортой нөөцийг нэмэгдүүлэх арга хэмжээ авсны үр дүнд өчигдрийн байдлаар Монгол Улсын валютын нөөц 5 тэрбум долларт хүрлээ. Өмнө нь 2022 оны арваннэгдүгээр сар мөн өнгөрсөн оны жилийн эцсээр гээд хоёр удаа 5 тэрбум ам.долларт хүрч байсан. Ийнхүү гурав дахь удаагаа валютын нөөц 5 тэрбум долларыг давлаа. Цаашдаа энэ дүнг тогтвортой барих, нөөцөө хамгаалах болон нэмэгдүүлэх чиглэлээр бодлогоо чиглүүлж ажиллах болно.
Нэгдүгээр улиралд нүүрсний хувьд хүнд цохилт авсан ч зэсийн экспорт маш сайн байлаа. Зэс өнгөрсөн оны мөн үетэй харьцуулахад биет хэмжээгээрээ 40 хувиар нэмэгдсэн байна. Мөн татварт төвлөрүүлдэг орлогын хувьд ч нэмэгдсэн сайн үзүүлэлттэй байгаа. Өөрөөр хэлбэл, нүүрсэн дээр алдсаныгаа зэсээр нөхөж байна. Хоёрдугаар улирал бол эдийн засгийн идэвхижлийн үе байдаг. 4-6 саруудад бүтээн байгуулалтын ажлууд эхэлдэг. Үүнийг дагаад орлого тодорхой хэмжээнд идэвхиждэг. Бидний хувьд шууд төлөвлөж болох эрэмбэлж болох Засгийн газрын хөрөнгө оруулалт, урсгал зардлууд дээр онцгой анхаарч ажиллахаар төлөвлөж байгаа. Төв банкны хуульд Монголбанкны алдагдлыг Засгийн газрын үнэт цаасаар нөхөж болно гэх заалт байдаг. Цаашдаа Засгийн газрын чадамж ямар байх болон Төв банкны алдагдлыг Засгийн газрын нөөцөөр хааж, санхүүжүүлэх боломж бодлогын шийдэл бий. Бид 30 жилийн туршид ийм хуулиар явж ирсэн. Татварын асуудлын хувьд одоо байгаа хуулийн хүрээнд хэлэлцээр хийж буулт хийнэ гэх ойлголт байхгүй" гэв.
