УИХ-ын гишүүн Ж.Ганбаатар Сүхбаатар дүүргийн 2 дугаар хороо, Циркийн урд тус бүр нь 25 орчим давхар, олон блок орон сууцны хороолол барьж буй. Нийт 13,316 м2 талбай бүхий тус газарт өмнө нь “Автобус бааз-3” үйл ажиллагаа явуулдаг байсан.
Улмаар 2021 онд УИХ-ын гишүүн Ж.Ганбаатарын үүсгэн байгуулсан “Камдер” ХХК “Автобус бааз-3”-ийн газар болон бусад объектыг худалдан авч, орон сууцны хороолол барьж эхэлсэн талаар бид өмнө нь мэдээлсэн.
Тэгвэл өнгөрөгч энэ сарын 4-ний шөнө Циркийн урд “Камдер” ХХК-ийн барьж буй барилга дээр ажиллаж байсан краны хэсэг ойролцоох “UB Central residence” орон сууцны барилга дээр унаж, зарим айлын цонх хагарсан хэрэг гарсан юм. Энэ талаар тус “Камдер” ХХК-г үүсгэн байгуулсан УИХ-ын гишүүн Ж.Ганбаатар “Манай компани тэр барилгын хөрөнгө оруулагч. Гүйцэтгэгч компани нь өөр. Тэр асуудал бол краны тросс унжсан л асуудал юм билээ. Нэг айлын цонх хагалсан гэдэг мэдээлэл авсан. Гүйцэтгэгч компанид нь хариуцлага тооцож байгаа юм билээ. Хохирлыг барагдуулсан л гэсэн” гэжээ.
