УИХ-ын гишүүн О.Батнайрамдал 2025 оны нэгдүгээр сарын 07-ны өдөр "Боловсролын зээлийн сангийн үйл ажиллагааны талаар" Боловсролын сайд П.Наранбаярт асуулт тавьсан байна.
Тэрбээр тус асуулгадаа "
- 1. Боловсролын зээлийн сангийн эргэн төлөлтийн явц болон эргэн төлөлтийг сайжруулах хүрээнд хийгдэж буй ажил, төлөвлөгөө, хөндлөнгийн хуулийн байгууллагатай хамтран ажиллаж буй ажлын явцын талаар
- 2. Дотоодын их, дээд сургуульд суралцагчдын зээл /оюутны хөгжлийн зээл/ -ийн эргэн төлөлт 98 хувь, гадаадад суралцаж төгссөн оюутнуудын зээлийн эргэн төлөлт 4 хувь байна. Эргэн төлөлтийн байдал ийнхүү зөрүүтэй байхад Монголбанкны зээлийн мэдээллийн санд дотооддоо зээлээр суралцсан төгсөгчдийн мэдээллийг бүртгэлжүүлэхгүй байгаа шалтгааны талаарх үндэслэл бүхий тайлбар
- 3. 2025 оны Төсвийн тухай хуулиар Боловсролын зээлийн сангийн нийт 158.4 тэрбум төгрөгийн батлагдсан төсвийн 33.6 тэрбум төгрөгийг зээлийн эргэн төлөлт болон бусад эх үүсвэрээс бүрдүүлэхээр төлөвлөсөн. Уг санхүүжилтийг хэрхэн бүрдүүлэх талаар авч хэрэгжүүлэх арга хэмжээний талаарх дэлгэрэнгүй мэдээлэл
- 4. Төрийн албан хаагчийг захиалгаар суралцуулж, чадавхжуулах бодлогыг хэрэгжүүлэхдээ Боловсролын зээлийн сангаас санхүүжүүлж буй зохицуулалт нь төрийн албыг мэргэшүүлэх ач холбогдолтой бөгөөд энэ талаар өмнө нь хэрэгжүүлсэн арга хэмжээний хүрээнд хамрагдсан төрийн албан хаагчийн тоо, сонгох шалгуурын талаарх мэдээллийг харьцуулсан байдлаар мөн 2025 онд уг бодлогыг хэрэгжүүлэхэд төсөөлөгдсөн зардлын хэмжээг хэрхэн тооцсон талаарх төсвийн мэдээлэл
- 5. Боловсролын зээлийн сангаас 2024 онд зарцуулсан төсөв, хөтөлбөрийн дүн, хэрэгжилтийн явц
- 6. Дээрх хөтөлбөрийн хүрээнд Засгийн газраас тогтоож байгаа эрэлттэй мэргэжлийн чиглэл нь оюутан, суралцагчдын Боловсролын зээлийн сангийн санхүүжилтэд хамрагдахад хязгаарлалт болж байгаа эсэх тийм бол энэ асуудлыг цаашид хэрхэх талаар баримталж буй бодлого авч хэрэгжүүлж байгаа арга хэмжээний талаарх мэдээлэл
- 7. Боловсролын зээлийн сангийн сонгон шалгаруулалтын явцыг цахимжуулах үйл ажиллагааны хэрэгжилтийн талаарх мэдээлэл" зэргээр асуулга тавьж, хариулт хүсчээ.
Энэ асуулгын хариуг ирэх долоо хоногт Боловсрол, соёл, шинжлэх ухаан, спортын байнгын хорооны хуралдаанаар хэлэлцэхээр болсон байна. УИХ-ын гишүүн О.Батнайрамдал нь Боловсролын зээлийн сангийн үйл ажиллагаа, журмын биелэлтэд хяналт шалгалт хийх, холбогдох санал, дүгнэлт гаргах, шийдвэрийн төсөл боловсруулах үүрэг бүхий ажлын хэсгийг ахалж байгаа бөгөөд уг асуудлаар өнгөрсөн жилүүдэд идэвхтэй ажиллаж байсан юм.
