УИХ-ын чуулганы хуралдаанаар 2025 оны төсвийн тухай хуулийн гурав, дөрөвдүгээр хэлэлцүүлгийг хийж эцэслэн баталлаа. Хуралдаанд оролцсон 106 гишүүний 68 нь төсвийн төслийг дэмжиж батлав.
УИХ-ын гишүүн Д.Энхтүвшин, Ж.Баярмаа нар 2025 оны төсвөөс 3.6 их наяд төгрөгийн урсгал зардлыг танах шаардлагыг гаргасан ч гуравдугаар хэлэлцүүлэгт шилжсэн хойно засварлах боломжгүй тул хүлээж авсангүй. Улсын төсөвтэй холбоотойгоор 2025 оны төсвийн жилд зарцуулах төсвийн зарлагын хэмжээг 26,485,278 сая төгрөг байхаар, төсвийн жилд төвлөрүүлэх төсвийн тэнцвэржүүлсэн орлого 23,140,589.3 сая төгрөг байхаар санал хураалт явуулж, гишүүдийн олонх нь дэмжсэнээр батлагдав.
