Аж үйлдвэр эрдэс баялгийн яам, Уул уурхайн ассоциаци хамтран аравдугаар сарын эхний долоо хоногт “Mining week” арга хэмжээг зохион байгуулсан.
Энэхүү арга хэмжээ нь Монголын аж үйлдвэр эрдэс баялгийн салбарыг гадаадын хөрөнгө оруулагч нарт сурталчлах, хөрөнгө оруулалтыг нэмэгдүүлэх зорилготой байсан. Гэсэн тус арга хэмжээнд гадаадын хөрөнгө оруулагч төдийлөн байгаагүй бөгөөд энэ талаар УИХ-ын гишүүн Д.Ганбат "Mining week"-д ирэх гадаадын хөрөнгө оруулагч байхгүй болсон. Иймэрхүү авлигажсан, хулгайтай газарт хэн ч орж ирэхгүй” гэдгийг тодотгож байсан билээ.
Тэгвэл “China Mining 2024” чуулган энэ өдрүүдэд БНХАУ-ын Тяньжинь хотод зохион байгуулагдаж байна. Тус арга хэмжээнд 70 гаруй улсын 500 гаруй компани, 1000 гаруй төлөөлөгч оролцож байгаа нь анхаарал татаж байна. Тэдний нэг нь Монгол Улс.
“China Mining 2024” чуулганд манай улсыг төлөөлж Аж үйлдвэр, эрдэс баялгийн яамны Төрийн нарийн бичгийн дарга С.Жавхланбаатар оролцож байгаа бөгөөд энэ үеэр илтгэл тавьсан байна. Тэрбээр илтгэлдээ, "Төрөөс аж үйлдвэр, эрдэс баялгийн салбарт баримталж буй бодлого, Монгол Улсын Засгийн газраас аж үйлдвэр, эрдэс баялгийн салбарт хэрэгжүүлж буй төсөл"-үүдийг танилцуулж хэлэлцүүлсэн байна.
Товчхондоо, Монголын "Mining week"-д гаднын хөрөнгө оруулагчид ирээгүй тул Аж үйлдвэр, эрдэс баялгийн яамны Төрийн нарийн бичгийн дарга С.Жавхланбаатар БНХАУ-ын "Mining 2024”-т оролцож буй гадаадын хөрөнгө оруулагчдад "Төрөөс аж үйлдвэр, эрдэс баялгийн салбарт баримталж буй бодлого, Монгол Улсын Засгийн газраас аж үйлдвэр, эрдэс баялгийн салбарт хэрэгжүүлж буй төсөл"-үүдийг танилцуулжээ.
Б.Наранчимэг
_1819.jpg)
