БНСУ-аас Монгол Улсад суугаа Элчин сайдын яамнаас өчигдөр /2023.11.30/ “Монгол Солонгос сэтгүүлчдийн клуб”-ын оны хаалтын арга хэмжээг зохион байгууллаа. Тус арга хэмжээний үеэр БНСУ-аас Монгол Улсад суугаа Элчин сайд Ким Жун Гү БНСУ-ын Хууль зүйн яамнаас Монгол Улсын иргэдэд олон удаагийн виз олгох журамд өөрчлөлт орж байгаа талаар танилцууллаа. Ерөнхий сайд Л.Оюун-Эрдэнэ өнгөрсөн хавар БНСУ-д айлчлахдаа визний асуудлыг хэлэлцсэн. Харин БНСУ-ын зүгээс виз олгох нөхцөлийг уян хатан байлгах чиглэлд анхаарна гэдгээ мэдэгдсэн байна.
Тухайлбал, олон удаагийн виз олгох хүрээг нэмэгдүүлэх чиглэлд боловсролын зэрэгтэй холбоотой нөхцөлийг хөнгөвчлөх визний өөрчлөлтөд БНСУ-д коллежоос дээш хөтөлбөрийг дүүргэсэн эсвэл бусад улсад магистраас дээш зэрэг хамгаалсан иргэн болгож өөрчилжээ. Зөвхөн бакалавр байсан бол коллежоос дээш хөтөлбөрийг дүүргэсэн болгож өөрчилсөн байна.
Мөн визний хүчинтэй хугацааг сунгах чиглэлд богино хугацааны аялал, оршин суух хугацаа 90 хоног, хүчинтэй хугацаа гурван жил болгож сунгажээ. Энэхүү өөрчлөлт нь энэ сарын 20-ны өдрөөс эхэлж албан ёсоор хэрэгжиж эхлээд байгаа аж. БНСУ-ын хувьд визний нөхцөлийг уян хатан болгож байгаа хэдий ч визний зөрчилтэй хатуу тэмцэхээ илэрхийлсэн байна. Мөн энэ үеэр “Монгол Солонгос сэтгүүлчдийн клуб”-ын гишүүн сэтгүүлчдэд 3 жилийн виз БНСУ-ын тал олгож буйгаа мэдэгдэж, хамтарсан ажилласан шилдэг хэвлэл мэдээллийн хэрэгслээр Mkor сайт болон UBS телевизийг шалгарсан байна. Тэгвэл “Монгол Солонгос сэтгүүлчдийн клуб”-т News.mn, Eguur.mn, iSee.mn, UBS, NTV, Өдрийн сонин зэрэг хэвлэл мэдээллийн байгууллагууд багтдаг байна.
