Маргаашаас Улаанбаатар хотод хэрэгжих хатуу хөл хорионы үед эрүүл мэндийн байгууллагууд ямар зохицуулалттайгаар ажиллахыг НЭМГ-ын дарга Б.Бямбадорж танилцууллаа. Үүнд:
- Амаржих газруудаас төрсөн эх нярай гэртээ гарахад тухайн амаржих газар, эмнэлгийн байгууллага өөрсдөө хариуцаж хүргэж өгнө. Төрсөн эх нярайг Нийслэлийн түргэн тусламжийн газар хариуцаж гэрт нь хүргэх ажлыг төлөвлөсөн.
- Өрхийн эрүүл мэндийн төв нь үйл ажиллагаан тасралтгүй, хэвийн байдлыг хангах зохицуулалтыг хийх ба үйл ажиллагааны жирэмсний хяналт, нярайн болон гэрийн эргэлт үзлэгийг бүрэн хийж, зөвлөгөө өгнө.
- Өрхийн эмч нар өвчтөний гэрээр очиж хийдэг өдрийн эмчилгээг тарилгын бус хэлбэр буюу эмийн эмчилгээг зөвлөнө.
- Өрхийн эмч нар өндөржүүлсэн бэлэн байдлын үед өвчтөндөө утсаар, онлайнаар зөвлөгөө өгч байнгын холбоотой ажиллана. Зайлшгүй шаардлагатай тохиолдолд тусгай эмч очиж үзлэг хийнэ.
- Тухайн хорооны нутаг дэвсгэрт ойр байрлах 2-оос доошгүй эмийн санг тогтмол үйл ажиллагаатай байхаар зохицуулалт хийж, ажиллаж байгаа гэдгийг харуулах таних тэмдэг гадна талд нь байршуулж иргэдийг мэдээллээр хангана.
- Илрүүлэг шинжилгээнд ажиллах эмч, эмнэлгийн ажилтнуудыг автобусаар тээвэрлэнэ.
- Гемодиализ, хавдрын хими, туяа эмчилгээ, мэс заслын дараах тусламж үйлчилгээ шаардлагатай иргэдийг ажилчдын автобусаар хүргэж, авна.
- Тухайн эмнэлгийн лабораторид тодорхойлдоггүй үзүүлэлтийг шинжлэх зайлшгүй тохиолдолд тухайн бүсэд ойр байрлах эрүүл мэндийн байгууллагуудтай гэрээ байгуулж, бэлэн байдлыг хангана.
- Түргэн тусламжаар хүргэгдэж ирсэн сахиур болон дагалдаж яваа иргэдийг халдвар хамгаалалтын дэглэм баримтлуулан өөрийн эмнэлэгтэй байрлуулах үүргийг хүлээнэ.
- Өндөр настан, жирэмсэн эмэгтэй, хүүхдийг сахиураар авахгүй бөгөөд сахиур солихгүй.
- Яаралтай тусламжийн тасгаар үйлчлүүлээд гэртээ буцах тохиолдолд тухайн эмнэлэг нь иргэнийг хүргэж өгнө.
-
Мөн зайлшгүй шаардлагатай тохиолдолд хотоос гарах /буяны ажил, эрүүл мэндийн шалтгаан, хүнс, өвс, тээвэр гэх мэт/ тохиолдолд ПГУ/PCR шинжилгээг авах зохицуулалт хийх аж.