Цаг уур, орчны шинжилгээний газраас гаргасан 2026 оны долоодугаар сарын 24-нөөс наймдугаар сарын 3-ныг хүртэлх 10 хоногийн урьдчилсан мэдээгээр, энэ сарын 27-ноос ихэнх нутгаар бороо орж, агаарын температур бага зэрэг сэрүүсэх төлөвтэй байна.
Тодруулбал, энэ сарын 27-нд баруун аймгуудын зарим газар, төвийн аймгуудын ихэнх нутаг, зүүн аймгуудын хойд, говийн аймгуудын баруун болон хойд хэсгээр бороо, дуу цахилгаантай аадар бороо орно. Харин 28-нд баруун аймгуудын зүүн хэсэг, төв болон говийн аймгуудын ихэнх нутгийг хамарсан бороо орох төлөвтэй байна.
Мөн 29-30-нд баруун, төв, зүүн аймгуудын зарим болон ихэнх нутгаар, 31-нд төвийн бүсийн нутгаар, наймдугаар сарын 1-нд төв болон зүүн аймгуудын хойд хэсгээр бороо, дуу цахилгаантай аадар бороо үргэлжлэн орохыг анхааруулжээ.
Салхи ихэнх хугацаанд секундэд 5-10 метр байх бөгөөд борооны өмнө түр зуур ширүүснэ. Агаарын температурын хувьд долоодугаар сарын 27-ноос баруун болон төвийн аймгуудын хойд хэсгээр, цаашлаад ихэнх нутгаар бага зэрэг сэрүүснэ.Монгол-Алтай, Хангай, Хөвсгөл, Хэнтийн уулархаг нутаг, Завхан голын эх, Хүрэнбэлчир, Тэрэлж голын хөндийгөөр шөнөдөө +6...+11, өдөртөө +19...+24 градус, Их нууруудын хотгор болон говийн өмнөд хэсгээр шөнөдөө +20...+25, өдөртөө +31...+36 градус, Говийн хойд хэсгээр шөнөдөө +16...+21, өдөртөө +27...+32 градус, Бусад нутгаар шөнөдөө +12...+17, өдөртөө +23...+28 градус дулаан байх төлөвтэй байна.Иймд иргэд, малчид, аялагчид болон замын хөдөлгөөнд оролцогчдыг аадар бороо, түр зуурын хүчтэй салхи, үер усны эрсдэлээс сэрэмжтэй байхыг цаг уурчид зөвлөжээ.
.jpg)
