УИХ-ын гишүүн П.Сайнзориг өөрийн албан бланк дээр Ерөнхий сайдыг огцруулахаар гишүүдийн гарын үсгийг цуглуулж, өчигдөр УИХ-д өргөн мэдүүлсэн. П.Сайнзориг гишүүний бланк дээр 50 гаруй УИХ-ын гишүүн гарын үсэг зурсан гэж буй.
Тэгвэл Ерөнхий сайд Г.Занданшатарыг огцруулах саналыг баасан гарагт Төрийн байгуулалтын байнгын хороо, чуулганы хуралдаанаар хэлэлцэхээр болжээ. УИХ-ын дэгийн тухай хуульд зааснаар Ерөнхий сайдыг огцруулах санал тавьсан бол УИХ 7 хоногийн дотор хэлэлцэж, 10 хоногийн дотор шийдвэр гаргана гэсэн хуулийн заалттай. Хэрвээ нийт гишүүдийн 50+1 хувь буюу 64-өөс дээш гишүүн дэмжвэл Ерөнхий сайд Г.Занданшатар огцорно. Ингэснээр Засгийн газар бүрэн бүрэлдэхүүнээрээ огцрох юм.
УИХ-ын дэгийн тухай хуульд:
- 101.1.Гишүүд Монгол Улсын Үндсэн хуулийн Дөчин гуравдугаар зүйлийн 1 дэх хэсэгт заасны дагуу Ерөнхий сайдыг огцруулах саналыг Улсын Их Хуралд албан ёсоор тавьсан бол Улсын Их Хурал уг асуудлыг 7 хоногийн дараа хэлэлцэж эхлэн 10 хоногийн дотор шийдвэрлэнэ.
- 101.2.Төрийн байгуулалтын байнгын хороо Ерөнхий сайдыг огцруулах саналыг хуралдаанаараа хэлэлцэж санал, дүгнэлт гарган нэгдсэн хуралдаанд танилцуулна.
- 101.3.Нэгдсэн хуралдаан Байнгын хорооны санал, дүгнэлтийг сонсож, ил санал хураалт явуулна.
- 101.4.Улсын Их Хурлын нийт гишүүний олонх Ерөнхий сайдыг огцруулах саналыг дэмжсэн бол Ерөнхий сайдыг огцруулах тухай тогтоол баталсанд тооцно. Ерөнхий сайдыг огцруулах саналыг дэмжээгүй бол уг асуудлаар шийдвэр гарахгүй.
- 101.5.Байнгын хорооны болон нэгдсэн хуралдаанд гишүүд асуулт асууж, үг хэлж болно.
- 101.6.Нам, эвслийн бүлэг санал, дүгнэлт гаргасан бол 5 минутад багтаан нэгдсэн хуралдаанд танилцуулж болно.
- 101.7.Монгол Улсын Ерөнхийлөгч, Ерөнхий сайд нэгдсэн хуралдаанд үг хэлж болно.
- 101.8.Ерөнхий сайд Монгол Улсын Үндсэн хууль зөрчсөн, эсхүл Ерөнхий сайдыг огцруулах үндэслэлтэй гэж Цэц дүгнэлт гаргасан бол энэ хуулийн 85, 86 дугаар зүйлд заасны дагуу хэлэлцэн шийдвэрлэнэ гэж заасан.
