Өнөөдөр /2025.09.15/ УИХ-ын Намрын чуулган нээлтээ хийлээ. Энэ удаагийн чуулганаар Улсын 2026 оны төсвийг хэлэлцэнэ. Харин чуулганы хуралдааны нээлтэд Ерөнхийлөгч асан, УИХ-ын гишүүн Х.Баттулга, Ерөнхий сайд асан Л.Оюун-Эрдэнэ нар оролцсон нь анхаарал татсан сэдэв болоод байна.
Харин намрын чуулганы нээлтийн дараа УИХ дахь МАН, АН-ын бүлэг хуралдсан юм. Тэгвэл МАН-ын бүлгийн хуралд УИХ-ын гишүүн, МАН-ын дарга Л.Оюун-Эрдэнэ оролцож, "МАН-ын Удирдах зөвлөлийн хурлыг яаралтай хиймээр байна" гэсэн санал гаргасан гэх мэдээллийг эх сурвалж бидэнд өгч байна. Мөн тэрбээр, "нэг нам /МАН/-ын дотоод асуудлаас болж хамгийн том төслөө унагах гэж байгаа бол "Чайна энержи"-ийн гэрээгээ цуцлаад ахиад төмөр замын хэлэлцээрээ эхлүүлнэ биз. Дахиад маш хугацаа орж, Монгол л хохирно" гэсэн утгатай үгийг хэлжээ. Учир нь хил холболтын төмөр замын гэрээг байгуулахдаа Монгол Улсад 10 тэрбум ам.долларын алдагдалтай гэрээ байгуулсан гэх мэдээлэл гараад байгаа юм.
