Ардчилсан намын даргаар сонгогдсон О.Цогтгэрэл мэдээлэл өглөө.
Тэрбээр " Өнөөдөр Ардчилсан намын 363 гишүүний 310 нь хуралдаа ирлээ. Эхний санал хураалтаар 63 хувийн санал авч сонгогдлоо. 50+1 гишүүдийн санал авсан. Ийм өндөр дээд итгэл хүлээлгэсэн Ардчилсан намынхандаа, төлөөллийн дээд байгууллагын гишүүддээ талархлаа илэрхийлье. Ардчилсан нам дараалсан, давхар ялалтыг зорилгоо болгож ажиллах ёстой. Өөрөөр хэлбэл, Ардчилсан намын 2028 он, 2032 оны сонгуульд дараалан ялах амбицтай, зорилготой байх ёстой. Давхар ялна гэдэг нь Ерөнхийлөгч, орон нутгийн сонгуульд ялахыг хэлж байгаа юм. Гол нь ингэж байж ардчилсан тогтолцоо, хувийн өмч, хүний эрхийг дээдэлсэн, жижиг төрийг дээдэлсэн тогтолцоо батжин бэхжих ёстой. Энэ зорилгыг би өөртөө болон хамт зүтгэх нөхөддөө уриалж байна. Миний хувийн бодол бол Ардчилсан нам Засгийн газарт хамтрахыг дэмжихгүй. Гэхдээ нам бол ганц даргынх биш. Нам болон нийтийн институци, төлөөллийн байгууллага. Олонхийн шийдвэр гарвал дарга ч бай хэн ч бай биелүүлэх үүрэгтэй. Сүүлийн 8 жилийн хугацаанд Монголын татвараас бүрдүүлдэг төсөв 6 дахин нэмэгдсэн. 6 их наядаас 30 их наяд болж нэмэгдсэн. Энэ хэмжээгээр төр нэмэгдсэн. Монгол Улс төржсөн, төвлөрсөн, төсөвжсөн. Энэ гурвыг задлах ёстой. Төрийн өмчит компаниудыг задлах ёстой. Уул уурхайн компаниудыг төр захиран зарцуулдаг. Тэр мөнгөө халамжинд өгдөг. Ингэснийхээ үр дүнд зай завсаргүй ялдаг байдлыг халах ёстой" гэлээ.
ВИДЕО:
