Энэ долоо хоногийн Лхагва гараг /2025.08.27/-т хуралдсан Засгийн газрын хурлаар “Төгрөг нуурын бүлэг ордыг төрд буцаан авлаа” гэх шийдвэрийг гаргалаа.
Уг шийдвэр хар массынхаа сэтгэл хөдлөлд тааруулж буй аятай “Төгрөг нуурын энержи ХХК-т олгосон хайгуулын тусгай зөвшөөрлийг хүчингүй болгож шийдвэрлэхийг Ерөнхий сайд Г.Занданшатар Ашигт малтмал, газрын тосны газарт даалгалаа” гэх үгээр уянгалав. Улмаар Төгрөг нуурын ордыг стратегийн ордод хамааруулах Засгийн газраас тогтоох асуудлыг яаралтай боловсруулж, ирэх сард багтаан Засгийн газрын хуралдаанд оруулахыг Аж үйлдвэр, эрдэс баялгийн сайд Г.Дамдиннямд үүрэг болголоо гэв.
-Х.БАТТУЛГЫН 250 САЯ АМ.ДОЛЛАРТ ЗАРААД, АШГАА ОЛООД ГАРСАН ТӨГРӨГ НУУРЫН ЛИЦЕНЗИЙГ ЦУЦЛАВ-
Үнэндээ, Ерөнхийлөгч асан Х.Баттулга “Төгрөгнуурын энержи” ХХК-ийн хувьцааг эзэмшиж байхдаа өөртөө давуу байдал бий болгож, ашигт малтмалын тусгай зөвшөөрөлтэй хуулийн этгээдийг гадаадын хөрөнгө оруулалттай компанид худалдаж их хэмжээний орлого олж, мөнгө угаасан байж болзошгүй үйлдэлд нь АТГ-аас хэрэг бүртгэлтийн хэрэг нээн мөрдөн шалгах ажиллагаа явуулж байгаа гэдэг.
ВИДЕО:
Энэ талаар ЗГХЭГ-ын дарга асан Н.Учрал мэдээлэл хийх үеэрээ, “2006 онд Төгрөг нуурын орд газрын 90 хувийг УИХ-ын гишүүн Х.Баттулга, 10 хувийг нь Я.Батсүх эзэмшдэг компани болохыг нотолсон баримт надад байна. Мөн Х.Баттулгын төрсөн охин Х.Намууны компанид хувьцаагаа дамжуулан мөн үндэстэн дамнасан компаниар дамжуулан 250 сая ам.доллароор зарсан болохыг нотолж байна. Хонконгийн бирж дээр байгаа 507 дугаар нүүр баримтад бүх мэдээлэл нарийвчлан агуулсан нотлох баримт гэж хэлж болно. Энэ 507 баримт дотор хэлцлийн нөхцөл, үнэлгээ, төлбөрийн бүтцүүд, хувьцаа, өрийн бичиг, хөрвөх цаас, эзэмшигчдийн бүтцийн өөрчлөлт, Төгрөг нуурын ордын тооцоо, ТЭЗҮ зэрэг бүх мэдээллийг нарийвчлан агуулсан байгаа. Энэ 507 баримт дотор Х.Баттулга өөрөө сайд байхдаа өөрийнхөө компанитай буюу өөрөө, өөртэйгөө гэрээ байгуулсныг харж болно" хэмээн мэдэгдсэн.
Товчхондоо, Ерөнхийлөгч асан Х.Баттулга Төгрөг нуурын орд газрын лицензийг Хонконгийн бирж дээр 250 сая доллароор зарж, асар их ашиг олсон гэсэн үг.
Ерөнхийлөгч асан Х.Баттулгад “Төгрөг нуурын ордтой хамааралтай эсэх” -ээ тайлбарлах долоо хоногийн хугацаа өгсөн ч, тэрээр “намайг Төгрөг нууртай хамаатай гэдгийг нотолж чадах юм бол 100 хувь аваарай” гэж мэдэгдсэн. Х.Баттулга ингэж хэлээд, инээж суух нь арга ч үгүй юм. Учир нь тэрээр Төгрөг нуурын ордыг 2010 оны эхээр 250 сая ам.долларт зараад өөрөө асар их хэмжээний орлого олчихсон, одоо түүнд Төгрөг нуурын орд “түй ч хамаагүй” тул ингэж хэлэх нь аргагүй биз.
-ЕРӨНХИЙ САЙД Г.ЗАНДАНШАТАР ДОТООД, ГАДААДЫН ХӨРӨНГӨ ОРУУЛАГЧДЫГ ДАХИН ҮРГЭЭВ-
Төгрөг нуурын орд газар нь Төв аймгийн Баян сумын нутагт оршдог бөгөөд Улаанбаатар хотоос 130 км зайтай. Ордын талбай хэмжээг 20-30 км хэмээн тооцсон бөгөөд хүрэн нүүрсний нөөц нь урьдчилсан байдлаар 3 тэрбум тонн бөгөөд эрчим хүчний нүүрсний нөөцийг илүү нарийвчлан тогтоох шаардлагатай хэмээн үздэг байна.
Төгрөг нуурын бүлэг ордод 10 гаруй компани лиценз эзэмшдэг бөгөөд хамгийн олон буюу дөрвөн байршилд ашиглалтын тусгай зөвшөөрлийг "Төгрөгнуурын энержи" ХХК эзэмшдэг байна. Тус компанийн эцсийн өмчлөгч нь Боожоогийн Норовсамбуу бөгөөд Төгрөг нуурын бүлэг ордод нийт 1,113.43 га талбайг ашиглалтын тусгай зөвшөөрөлтэйгөөр эзэмшиж байна. Тухайн компанийн хувьд 2007 оны 03 дугаар сарын 21-нд үүсгэн байгуулагдсан бөгөөд Самех ХХК-ийн хувь эзэмшилд байдаг байна. Нэг үгээр хэлвэл Төгрөг нуурын бүлэг ордыг бүхэлд нь эзэмшдэг гэх Самех ХХК-ийн охин компани юм.
Өнгөрөгч зургаадугаар сард Г.Занданшатар Ерөнхий сайдад нэр дэвшиж байхдаа, “Гадаадын хөрөнгө оруулалт ч гэлтгүй дотоодын хөрөнгө оруулалтыг ч дэмжиж байж эдийн засаг, ажлын байр бий болж шинэчлэлт хийгдэх нь ойлгомжтой” хэмээн мэдэгдэж байсан. Гэтэл Ерөнхий сайд Г.Занданшатар Ерөнхийлөгч асан Х.Баттулгын зарж, үрээд өөртэй нь ямар ч хамаагүй болсон "Төгрөгнуурын энержи" ХХК-ийн тусгай зөвшөөрлийг хүчингүй болгож шийдвэрлэхийг Ашигт малтмал, газрын тосны газарт даалгаж, гадаад, дотоодын хөрөнгө оруулагчдыг үргээх нэг алхмыг дахин хийлээ.
Учир нь Ерөнхийлөгч асан Х.Баттулга, Ерөнхий сайд Г.Занданшатар нар "Салхитын мөнгөний орд"-ын тусгай зөвшөөрлүүдийг цуцалж, улсын мэдэлд авч байлаа. Энэ нь монголд хөрөнгө оруулалт хийвэл төрд нь ийнхүү дээрэмдүүлнэ гэсэн таагүй мессежийг гаднынханд өгсөн байж болзошгүй гэдэг.
