УИХ-ын гишүүн Ж.Баярмаа Ардчилсан намын даргад нэр дэвших хүсэлтээ албан ёсоор гаргалаа.
Энэ үеэр тэрбээр " Хэрвээ Ардчилсан намын дарга болбол даргалдаг дарга болохгүй. Би ухардаггүй тэмцэгч, урагшилдаг манлайлагч байх болно. Хамгийн чухал зүйл бол Ардчилсан нам 2028 оны УИХ-ын сонгуульд ялж, Засгийн газрыг удирдах. Засгийн газрыг удирдахдаа баруун төвийн үзлээрээ асуудал бүрт хандана. Энэ үзэл баримтлалаараа эдийн засгийн эрх чөлөөг яаж хангах юм, бэхжүүлэхэд яаж анхаарах юм гэдэгт анхаарч ажиллана. Мэдээж хувь хүний улс төрийн бөгөөд иргэний эрх чөлөөг бүрэн дүүрэн хангах ёстой. Ямар ч хүн үгээ хэлэхдээ хэнээс ч юунаас ч айдаггүй нийгмийг цогцлоохын төлөө ажиллана. Бид ардчиллын 35 жилийн үйл хэргээр замнаж байгаа ч хүний эрх зөрчигдөж байгаа тохиолдолд бий. Манай улсад ажлын байр нэмэгдсэнгүй, ажилгүйдлийн тоо буурсангүй, үнийн өсөлт хурдаараа өсч байна, инфляци гаарч байгаа. Ардчилсан намын үзэл баримтлал бол төр цомхон, эсрэгээрээ хувийн хэвшил илүү олон болох ёстой. Хувийн хэвшлийг бойжуулахын тулд бид нар ажиллана. Ардчилсан намд баг хамт олон бий. Бүх зүйлийг судалгаа шинжилгээнд үндэслэн хийнэ. Бид нар сөрөг хүчний үүргийг гүйцэтгэж байгаа. Энэ үүргээ сайн хэрэгжүүлэх ёстой. Энэ сонгуулийн ялагч нь Монгол Улсын эрх ашиг, Монгол Улсын захиалга байна гэдэгт итгэж байна. Нэр дэвшигчид ба тэдгээрийн багаас мөнгө авч байгаа. Энэ мөнгийг гарах ёстой зардал маш тодорхой арга хэмжээнд зарцуулна. Бид ҮБХ-ны хурлаын дараа Их хурлаа хийж намын даргаа ёсчлон батална" гэв.
ВИДЕО:
.jpg)
