АН-ын даргыг тодруулах Үндэсний бодлогын хорооны хурал Ням гараг /2025.08.31/-т болно. Иймд АН-ын даргад нэр дэвшин өрсөлдөх хүсэлтэй тус намын гишүүд өнөөдөр /2025.08.29/ өөрийн материалаа Дотоод сонгуулийн хороонд өгч эхлээд байна. Тодруулбал, УИХ-ын гишүүн, УИХ дахь АН-ын бүлгийн дарга О.Цогтгэрэл өрсөлдөх хүсэлтээ өгсөн бол дөнгөж сая УИХ-ын дэд дарга Б.Пүрэвдорж намын даргад нэр дэвших хүсэлтээ өргөн барилаа. Үүний дараа УИХ-ын гишүүн Ж.Баярмаа, Ө.Шижир нар нэр дэвшигчийн хүсэлтээ өргөн барина гэх мэдээлэл байна.
Энэ үеэр нэр дэвшигч Б.Пүрэвдорж " Монгол Улсын нийт эдийн засгийн 40 хувийг төсөв, 30 хувийг төрийн өмчийн компаниуд, 10 хувийг төсвийн хөрөнгө оруулалтаас бүрдүүлдэг. Өөрөөр хэлбэл, 75 хувийг төлөвлөгөөт эдийн засаг эзэлж байна. Ийм л эдийн засагтай болчхоод байна. Эдийн засгийн эрх чөлөөг бий болгохыг голлон баримтална. Ингэхдээ ард түмний татварыг зөв зүйлд зарцуулах, төрийн зардлыг багасгах ёстой. Илүү цомхон төрөөр эдийн засгийг удирдах боломжийг нээж өгнө. НӨАТ-ын татварын буцаан олголтыг 5 хувь болгох, нийгмийн даатгалын шимтгэлийг бууруулах ажлыг хийнэ. Төсвөөр дамжуулж хувийн хэвшлийг хөгжүүлдэг улс орнууд илүү хөгжиж байна. Тиймээс энэ боломжийг нээж өгнө. Томоохон албан тушаалтнуудын хармааны компаниудыг цөөлнө. Төрийн өмчийн компани, орон нутгийн өмчит компаниудыг хувийн хэвшилд шилжүүлснээр төр цомхон болно. 2016 оноос хойш хэт олонх болсон МАН олонхдоо аархаж хулгай хийх нь хэрээс хэтэрсэн. Ковидын хулгай, ЖДҮ-ийн хулгай, төмөр зам, нүүрсний хулгай, ногоон автобусны хулгай гээд маш олон хулгай гарсан. Энэ бүх хулгайд хариуцлага тооцоогүй. Хариуцлагын системийг Монголд авчрах нь чухал байна. Хэдэн их наядаар нь хулгай хийсэн хүмүүс хэдхэн жил шоронд сууж, хэдхэн төгрөгөөр торгуулж байна. Тиймээс 2028 онд АН ялагдах эрхгүй. Ард түмний төлөө АН эв нэгдэлтэй байж ард түмнийхнээ итгэлийг олох ёстой юм" гэлээ.
ВИДЕО:
.jpg)
