Өчигдрийн /2025.08.28/ АН-ын Үндэсний бодлогын хорооны хурлаар Л.Гантөмөрийг намын даргаас чөлөөлж, дараагийн даргыг сонгох дотоод сонгуулийг зохион байгуулах 15 хүний бүрэлдэхүүнтэй "Сонгон шалгаруулах" хороог байгуулсан.
-15 ФРАКЦААС НЭГ, НЭГ ТӨЛӨӨЛӨЛ ОРОЛЦУУЛСАН СОНГОН ШАЛГАРУУЛАХ ХОРООГ БАЙГУУЛАВ-
Мөн үргэлжлүүлэн дүрмийн шинэчлэлээ бага зэрэг яриад 20.00 цагт хурлыг тараасан байна. Дээрх 15 хүний бүрэлдэхүүнтэй ажлын хэсэгт фракц бүрийн төлөөллөөс нэг хүн багтаасан гэж хурал зохион байгуулагчид тодотгосон. Үүнээс үзвэл АН албан ёсны 15 фракцтай аж.
Харин өнөөдөр /2025.08.29/ намын даргад нэр дэвшигчдийн бүртгэлийг явуулна. Тус намын дүрмийн 5.17.4 дэхь "Намын даргад нэр дэвшигч нь Үндсэн дүрэм зөрчиж шийтгэл хүлээгээгүй, намд элсээд 10 жил болсон, тухайн үеийн хүчин төгөлдөр ҮБХ-ны нийт гишүүдийн 10 хувийн дэмжлэг авч, гарын үсэг зуруулсан, намын сонгуульт гишүүн ҮБХ, ҮЗХ-ээр 4-өөс доошгүй жил ажиллаж байсан гишүүн байна" гэсэн заалтаар АН-ын даргад нэр дэвшихээ илэрхийлээд байсан УИХ-ын гишүүн Ч.Лодойсамбуу, Л.Мөнхбаясгалан нар нэр дэвших боломжгүй болсон.
-50+1 ГЭСЭН ЗАРЧМААР САНАЛ ХУРААНА-
Харин АН-ын даргад өрсөлдөхөөр өнөөдөр АН-ын бүлгийн дарга О.Цогтгэрэл, УИХ-ын гишүүн Ж.Баярмаа, Б.Пүрэвдорж, Боловсрол судлалын доктор Б.Отгонбат нар нэрээ дэвшүүлэхээр бүртгүүлэх аж.
Нэр дэвшигчид энэ сарын 31-нийг хүртэл өрсөлдөж, мөрийн хөтөлбөр зэргээ гишүүддээ танилцуулах бөгөөд гол өрсөлдөөн О.Цогтгэрэл, Ж.Баярмаа нарын дунд болно. Харин Б.Пүрэвдоржийн хувьд авсан саналын тоогоороо Ж.Баярмаагийн ард орох вий гэсэн бодит болгоомжлолтой байгаа талаар АН дотор ярьж байна. Түүний хувьд намын даргад өрсөлдөж авсан саналын тоогоороо хоёрт орох үүн дээрээ гишгэж 2027 оны Ерөнхийлөгчийн сонгуульд өрсөлдөх сонирхолтой байгаа билээ. Харин Б.Отгонбатын хувьд санал авах магадлал бага учир нэр дэвшүүлэх эцсийн процесс дээр буцаж магадгүй аж. Санал хураалтыг 50+1 гэсэн саналаар явуулах бөгөөд 10 хувийн санал аваагүй хүмүүсийг хасч, өндөр санал авсан хүмүүсийн дунд гол өрсөлдөөнийг зохион байгуулна гэх мэдээлэл байна. Эх сурвалжийн мэдээлж буйгаар О.Цогтгэрэл намын Их хурлын гишүүдийг маш сайн хайрцаглаж байгаа ч түүний хувьд хамгийн чухал өрсөлдөгч нь Ж.Баярмаа болох нь.
