Орос-Украины дайныг дипломат замаар зохицуулах зорилготой олон улсын уулзалт өчигдөр /2025.04.23/ Лондон хотноо болж өндөрлөсөн байна. Украин, Европын холбоо болон АНУ-ын төлөөлөгчид нэг дор цугларч, хоёр жил гаруй үргэлжилж буй дайныг зогсоох арга замын талаар анх удаа илүү гүнзгий түвшинд хэлэлцсэн ч АНУ сүүлчийн мөчид оролцооны түвшингээ бууруулжээ.
Хэлэлцээрийн эхний шатанд АНУ-аас Төрийн нарийн бичгийн дарга Марко Рубио, мөн Д.Трампын засаг захиргааны итгэмжлэгдсэн төлөөлөгч Стивен Виткофф нар оролцох төлөвтэй байсныг зохион байгуулагч талууд нотолж байсан.
Гэвч эцсийн мөчид АНУ-д болсон дотоод стратегийн өөрчлөлт, аюулгүй байдлын шалтгааны улмаас тэд уулзалтад оролцохоос татгалзжээ.
Харин АНУ-ын талаас доод түвшний дипломат төлөөлөгчид оролцсон бөгөөд тэд “АНУ энхийн хэлэлцээг дэмжиж буй ч нөхцөл байдалд хянуур хандах шаардлагатай” гэдгийг онцолжээ. Украины төлөөлөгчид энэхүү уулзалтыг “энхийг эрэлхийлсэн анхны жинхэнэ алхам” хэмээн тодорхойлж, өргөн цар хүрээтэй эвлэрлийн саналыг хэлэлцсэн талаар мэдээлсэн ч Оросын тал албан ёсоор оролцоогүй байна.
Харин Европын холбооны улс орнууд уг уулзалтад идэвхтэй байр суурьтай оролцсон бөгөөд Германы Гадаад хэргийн сайд, Францын тусгай элч нар байлцсан байна. Тэдний зүгээс “энхийн процессыг олон улсын дэмжлэгтэйгээр амжилтад хүргэхийн тулд АНУ бүрэн оролцох нь зайлшгүй” гэсэн байр суурийг илэрхийлжээ. Энэхүү уулзалт нь Орос-Украины дайны хоёр дахь жилийн босгон дээр, олон улсын хамтын нийгэмлэгийн зүгээс энхийг эрэлхийлсэн хамгийн сүүлийн оролдлого хэмээн дүгнэгдэж байна. Гэсэн ч АНУ-ын байр суурь өөрчлөгдсөн нь хэлэлцээг цааш үргэлжлүүлэхэд тодорхой хүндрэл учруулж болзошгүй байгаа ажээ.
Эх сурвалж: BBC
