Маргааш буюу энэ сарын 23-нд баруун аймгуудын нутгаар, нөгөөдөр буюу энэ сарын 24-нд төвийн аймгуудын нутгаар цас орж, цасан шуурга шуурахыг анхааруулж байна.
Тодруулбал, маргааш баруун аймгуудын ихэнх нутгаар, энэ сарын 24-нд нутгийн хойд хэсгээр, энэ сарын 25-нд баруун аймгуудын нутгийн баруун өмнөд хэсэг, төв болон зүүн аймгуудын нутгийн зарим газраар, энэ сарын 26-нд говийн аймгуудын нутгийн өмнөд хэсэг, төвийн аймгуудын нутгийн зүүн хойд хэсгээр цас орж, цасан шуурга шуурна.
Салхи ихэнх хугацаанд ихэнх нутгаар секундэд 4-9 метр, маргааш буюу энэ сарын 23-нд баруун аймгуудын нутгаар, энэ сарын 24-нд ихэнх нутгаар, энэ сарын 25, 26-нд тал, хээрийн нутгаар секундэд 13-15 метр хүрч ширүүснэ.
Дархадын хотгор, Завхан голын эх, Хүрэнбэлчир орчим, Идэр, Тэс голын хөндийгөөр шөнөдөө -37...-42 градус, өдөртөө -27...-32 градус, Монгол-Алтай, Хангай, Хөвсгөл, Хэнтийн уулархаг нутаг, Эг, Үүр, Хараа, Ерөө, Туул, Тэрэлж, Хэрлэн, Онон, Улз голын хөндийгөөр шөнөдөө -30....-35 градус, өдөртөө -19....-24 градус, Их нууруудын хотгор, говийн бүс нутгийн өмнөд хэсгээр шөнөдөө -12...-17 градус, өдөртөө -6...-11 градус, бусад нутгаар шөнөдөө -23...-28 градус, өдөртөө -13...-18 градус хүйтэн байна.
Улаанбаатарт ирэх мягмар гараг буюу энэ сарын 24-нд цас орж, зөөлөн цасан шуурга шуурна. Бусад хугацаанд цас орохгүй. Салхи ихэнх хугацаанд секундэд 5-10 метр, энэ сарын 24-нд баруун өмнөөс хойш эргэж секундэд 12-14 метр хүрч ширүүснэ. Яармаг-Сонгины орчмоор шөнөдөө -27...-32 градус, бусад хэсгээр шөнөдөө -24...-29 градус, өдөртөө -13...-18 градус хүйтэн байна гэж Ус цаг уур орчны шинжилгээний газраас мэдээллээ.
